René Descartes

Retrait de Descartes per Frans Hals

René Descartes, nascut a La Haye en Touraine (vengut Descartes) lo 31 de març de 1596 e mòrt a Estocòlme (Suècia) lo 11 de febrièr de 1650, foguèt un matematician, fisician e filosòf francés, considerat coma un dels fondators de la filosofia modèrna.

Son metòde, expausat a partir de 1637 dins lo Discors del Metòde, e desvolopat apuèi, mostra una rompedura amb l'escolastica ensenhada fins alara : la soscadissa cartesiana es racionalista. En utilizar la rason sola dins l'estudi dels fenomèns, fondant una nòva metafisica radicalament diferenta de l'anciana, Descartes dorbís especialament la via a Malebranche, Spinoza, e tanben a las religions naturalas de las Luses (deïsme e teïsme).

Descartes, que son projècte filosofic s'inscritz en reaccion al procès de Galilèu (1633), aguèt una influéncia màger sus la pensada scientifica, mai que mai en França. L'impacte d'aquesta pensada foguèt grand que toquèt a de questions teologicas. Se pòt pas pasmens atribuïr a Descartes l'entièra paternitat de la filosofia modèrna, pr'amor que jutjava que seriá nociu de ne'n far usatge dins lo domeni politic.