Grafèma

Lo grafèma (del grèc γράφω, "escriure") es lo nom qu'es estat donat en lingüistica a la representacion escricha d'un son d'una lenga (dich fonèma en lingüistica), que sovent coincidís amb çò que sonam "letra" mas que pòt comprendre tanben d'autres elements coma las chifras. Dins un sistèma alfabetic existisson doas menas de grafèmas, los simples que correspondon a una sola letra e los grafèmas complèxes que combinan doas letras (digrafs coma per exemple nh en occitan) o de còps que i a tres (trigrafs). Es l'unitat contrastiva minimala de l'escritura d'una lenga determinada. L'estudi dels grafèmas e dels sistèmas d'escritura se sona grafemica o grafemistica.

Segon lo còdi grafic emplegat, un grafèma pòt aver de realizacions graficas e foneticas divèrsas. Aquí qualques exemples:

• Dins un abjad, per exemple en ebrèu, lo grafèma sòl representar una consonanta.
• Dins los sillabaris, coma en japonés, un grafèma representa generalament una sillaba.
• Dins un sistèma d'escritura ideografica, per exemple en chinés, lo grafèma representa un concèpte, un mot o un morfèma.