Cròs de Revelhon

Vista del pòrge d'intrada del Cròs de Revelhon

Lo Cròs de Revelhon es una cavitat naturala sosterranha a Albinhac.

Situacion

Se situa a 100 m del masatge de Revelhon, a 2 km a l'èst d'Albinhac e a 4,5 km al nòrd-èst de Ròc Amador, en Carcin, dins lo departament d'Òlt. La pichona rota que va de Revelhon a Lasbras passa en dessús de la vòlta del pòrge d'intrada a 100 m de la quòta 312 que es lo punt d'interseccion amb la D673. Se dobrís a las confinhas de Limarga (èst) e del Causse de Gramat (oèst), a l'endrech ont lo riusset de Salgues venent d'Albinhac se pèrd jos tèrra, dins una dolina boscosa.

Accès e risques

L'intrada, en forma de cauna, es dins una proprietat privada. L'accès e lo percors presentan de perilhs pels profans en tecnicas espeleologicas, en particular:

• las casudas en periòde umid dins la zona d'intrada o a l'interior de la cavitat dins un potz.
• las casudas de pèira dins lo pòrge d'intrada, zona fresca e magnifica que es perilhós de s'i arrestar; de blòcs se destacan regularament de la vòlta fenduda e geliva, donc cal passar ras de la paret de drecha.
• lo risc de s'aperdesir dins los corredors de la partida fossila.
• lo risc de demorar presonièr detràs de los sifons: P. Vidal indiquèt en 1955 aver vist lo pòrge d'intrada plen d'aiga. De corrents d'aiga violents modifican alavetz los emplenatges