Bauma de Chauvet

Chavals

La Bauma Chauvet se tròba a Valon, en Vivarés, alh sud delh departament d'Ardecha. Garda un daus ensembles picturaus pus importants de la Preïstòria europèa. Seguèt descubèrta lo 18 de decembre de 1994 per Joan Maria Chauvet, Éliette Brunel e Christian Hillaire. Se tròba alh luòc de la Comba d'Arc, que constituís un ancian meandre d'Ardecha, avans l'erosion delh Pònt d'Arc. Es classificada coma monument istoric dempuèi lo 13 d'octòbre de 1995.

Lo site sèrva de representacions nombrosas d'animaus (pinturas, gravaduras). Las datacions dirèctas per lo metòde delh carbòni 14 balhèron de resultats coerents pròches de 31 000 ans avans lo present. La comunautat scientifica admet gaireben unanimament que las òbras de la Bauma Chauvet datan de l'Aurinhacian e que son unas de las mai ancianas delh mond. La diversitat e lo mestritge de las tecnicas que ne testimònian faguèron tornar prigondament examinar l'idèa d'un art preïstoric evolucionant pro lentament e de manièra lineara.

Ièna (o ors moscalhat?) e pantèra dins la galariá de las mans

Sas pinturas aurinhacianas testimònian delh mestritge de tecnicas fòrça diversificadas (preparacion de las parets, gravaduras, detadas, mans en positiu, pinturas, esfumats...). Los tèmas abordats son essencialament bestialencs, çò que es tipic dins l'art paleolitic. Los predadors e los animaus jutjats perilhós i son ça que la excepcionalament frequents (leons, rinocèros, mamots...) alh detriment daus animaus pus classics coma lo chaval e lo bisont.

Per fin d'evitar las errors que fragilizèron las pinturas de Las Caus, la Bauma Chauvet serà pas jamai dubèrta alh grand public. Sols los scientifics, los preïstorians, certanas personalitats e los particulars que fan una demanda motivada la pòdon visitar. L'entrada de la bauma es protegida per una pesuga pòrta blindada ligada a un sistèma d'alarma. Una exposicion permanenta sus la Bauma Chauvet se tròba alh vilatge de Valon.

Pinturas (replica)

La proprietat de la bauma seguèt l'objècte d'una lònja batalha judiciària. En efèit, los proprietaris daus terrens aus environs e a l'entrada de la bauma (que demest eles lo primièr cònsol de Valon) volián èstre indemnizats. L'estat lhors acordèt inicialament una indemnitat que correspondiá a la valor d'un terren non constructible, siá 25 centims de franc lo mètre carrat. En 2001 lo Conselh d'Estat decidiguèt d'indemnizar los proprietaris en proporcion de la riquesa inestimabla de la bauma. Un procèssus en apèl, a Tolosa, decidiguèt una indemnitat pus favorabla aus proprietaris (1 777 còps mai que los 25 centims per mètre carrat) mas aquela resolucion seguèt anullada en cassacion. Se prevei un procèssus novèl a Lion.

• Portal de la Preïstòria
• Portal de Lengadòc