Lemosin (Occitània)

Lemosin

Localizacion
Capitala	Lemòtges
Lengas	occitan francés (per l'administracion francesa)
Gentilici	Lemosin, lemosina

Lemosin es una region istorica d'Occitània. Correspond a la ciutat antica dau pòble gal daus lemoviç. Uei correspond aproximativament a la region administrativa de Lemosin (departaments de Cruesa, Nauta Vinhana e Corresa) e a la partida més oriental de la partida occitana dau departament de Charanta (dins la region de Peitau-Charantas).

Sa capitala istorica es Lemòtges (o Limòtges).

Lo gentilici es lemosin -a.

Galariá

• 
  Usercha
• 
  L'egleisa de Sant Bartomieu de Confolent
• 
  Lo pont de Sant Marçau de Lemòtges
• 
  Lo merchat cobèrt de Lemòtges
• 
  La plaça de la Republica a Lemòtges
• 
  Una eoliana sus lo replanat de Miuvachas
• 
  Briva la Galharda
• 
  Lo chastèu de Rechoard

Eraudica

L'escut ancian (Ostau de Combòrn) es d'aur a cinc (o sieis) cotisas de gules. L'escut moderne (Ostau de Dreux-Bretanha) es d'ermina, bordat de gules.

Istòria

Segon Juli Cesar dins los Comentaris sus la Guèrra de las Gàllias, la tribú daus lemoviç joguet un grand ròtle dins la resisténcia galla. Lor capitala era l'oppidum de Durotincum (actuau Vilatjobert, situat a Sent Deunis). Aquela vila era lo punt d'encontre d'itineraris economics nombrós, en fach, los lemoviç eran coneguts per lor produccion d'aur esplechat dins las minas a ceu obert que i eran nombrosas. D'autres sites avián lor importància coma lo pueg d'Eissandon, Aiun, Usercha o encara Sent Gençan.

Lo territòri daus lemoviç comencet de se romanizar en 52 avans lo Crist, data de sa conquesta per Cesar. Las vilas fuguèren desplaçadas a fin de facilitar lo contraròtle de las rotas comercialas e daus autoctòns per l'autoritat romana. Aitau, la capitala daus lemoviç fuguet transferida a Augustoritum, la futura Lemòtges, ciutat creada entierament per los romans vers 10 avans lo Crist per fin de facilitar lo viatge per la ribiera de Vinhana.

Lemosin possedissiá de las ciutats segondàrias coma Briva Curretia (Briva) dins la rota Lion-Bordèu, Acitodunum (Aiun) dins la rota Borges-Clarmont. D'autres sites mai religiós, qu'òm ne serva daus vestigis, fuguèren creats o romanizats, coma Cassinomagus (Chassanom) per sas termas, Tintinhac a Navas emb un santuari ont se remarca un temple e un teatre, e tanben Los Cars a Sent Merd.

Daus riches proprietaris que vivián dins de villæ esplechavan las champanhas lemosinas. La toponimia a servat lo remembre d'aquelas esplechas agricòlas e quauques còps de lor proprietari. Daus vilatges nombrós que lor nom s'achaba en -ac son d'ancianas villæ, coma Flavinhac (villa de Flavinius), Solenhac (Solemniacum, villa de Solemnius). Se son trobats daus vestigis arqueologics coma los Convents a La Chapela, la villa de Péira Bufíera, o la villa galloromana e las termas de Brachaud, au nòrd de Lemòtges.

Geografia

Localizacion aproximativa de la província istorica de Lemosin, dins los limits d'Occitània (en roge). En blau: una configuracion tardiva de la província de Lemosin au Regim Ancian, mas i chau apondre la zona de la Marcha au nòrd e au nòrd-oèst d'aquela zona blava.