Erebor
Erebor foguèt, segon J.R.R. Tolkien, un reialme de nans de la Tèrra Mejana situat a la Montanha Solitària, prèp dels limits del Bòsc Lugubre.
La Montanha Solitària foguèt ont demorèt primièr Thrain I mas son filh Thorin I l'abandonèt per emigrar a las Montanhas Grisas.
Los dracs del fred expulsèron Thror e son pòble de las Montanhas Grisas. Per ansin, Thror tornèt a Erebor, ont poguèt amassar de tresaurs sens fin e faguèt d'amistat amb los òmes de Dale. D'annadas apuèi un drac (nomentat Smaug) arribèt de Glebièr Fenit,e expulsèt los nans de son reialme e destruiguèt atanben la vila de Dale.
Plusors nans emigrèron a las Montanhas de Fèrre mas la majoritat se dirigiguèt a las Montanhas Blavas dirigits per Thror, Thrain e Thorin Escutdegarric. Temps apuèi Thror moriguèt a Moria a mans d'Azog, e aquò provoquèt una òrre guèrra entre los nans e los orcs de las Montanhas Nebladissas. La Resulta foguèt una victòria estrecha per los nans. Aprés aquò, Thrain comencèt un viatge desesperat vèrs Erebor per assajar tornar conquistar lo reialme mas l'assag capitèt pas e Thrain finiguèt empresonat a Dol Guldur.
Alara Thorin venguèt rei de totes los nans e aprés un encontre amb Gandalf decidiguèt marchar amb tretze nans e un hobbit vèrs la Montanha Solitària. Atal voliá expulsar lo drac e conquistar tornarmai son reialme. Pendent aquel viatge Bilbon Saquet trobèt l'Anèl Unic, dins las Montanhas Nebladissas. Fin, finala, e aprés divèrsas aventuras, los nans podèron conquistar tornarmai Erebor malgrat que Thorin e dos dels sieus amics moriguèron a la Batalha de las Cinc Armadas (Smaug ja èra estat aucit per Bard l'Arquièr d'Esgaroth).
Dain II (cosin de Thorin) venguèt Rei jos la Montanha e mercés a aquò los nans poguèron i viure uroses pendent d'annadas e annadas.
Pendent la Guèrra de l'Anèl Erebor foguèt atacada pels aliats orientals de Sauron. Las armadas de Dale e la Montanha Solitària luchèron amassa contra aquelas armadas d'Orient e podèron ganhar lo sètge dins la montanha. Quora lo Senhor Escur foguèt desfach, los qu'èran dins la montanha podèron ganhar lors enemics. En aquela batalha perdèron la vida lo rei Dain d'Erebor (que foguèt succedit per son filh Thorin Elm de Pèira) e Brand, lo rei de Dale (que foguèt succedit per son filh Bard II)