Dick Dale
Richard Anthony Monsour, dich Dick Dale, nascut als Estats Units lo 4 de mai de 1937 a Boston e mòrt lo 16 de març de 2019 a Loma Linda en Califòrnia, es un guitarrista american d'origina libanesa e polonesa.
Jogava de guitarra electrica Fender Stratocaster, instrument a partir de lo qual a creat un estili de ròck original, mai que mai instrumental, dich surf ròck o surf music pr'amor de son ligam ambe l'espòrt del meteis nom (surf). Es d'alhors escaissat The King of Surf Guitar (lo rei de la guitarra surf).
En 1962, enregistra una represa surf ròck del títol Misirlou. S'agís a l'origina d'una cançon d'amor populara folclorica grèca, enregistrada pel primièr còp en 1927 a Atenas en Grècia per Michalis Patrinos. Aquela version novèla de Misirlou lo rend fòrça popular en Califòrnia. L'influéncia de Dick Dale se pòt aital ausir per exemple dins la musica dels Beach Boys.
En 1994, lo realizator de cinèma american Quentin Tarantino emplega lo Misirlou de Dick Dale sus la benda sonòra de son filme Pulp Fiction : la capitada del filme e de sa benda sonòra, d'aqueste títol en particular, contribuïrà al retorn dins las annadas 1990 de Dick Dale sus l'empont.