Colómbia es una republicapresidenciala. Lo president es lo cap d'Estat e tanben lo cap de govèrn, elegit dirèctament per la populacion per un periòde de quatre ans.
Los Andes dominan la mitat occidentala de Colómbia, e se dividisson en tres grandas sèrras: l'Occidental, la Centrala e l'Orientala. Entre las sèrras, los rius Magdalena e Cauca s'acaban cap a las planicias bassas al cors de la còsta cariba. En las parts mai nautas de las sèrras s'i tròban volcans, qualqu'uns que ne son encara actius. Lo punt pus naut es lo Mont Cristóbal Colón a la Sierra Nevada de Santa Marta, amb una nautor de 5 775 m per dessús lo nivèl de la mar.
La part orientala de l'estat se caracteriza per tèrras planas, en partida densament cobèrta per arbres e amb fòrça rius coma lo Putumayo, lo Yapura, lo Meta e lo Guaviare, que s'acaban al riu Orinòco o lo riu d'Amazonas. Colómbia a tanben divèrsas pichonas islas a l'ocean Atlantic e al Pacific.
Lo clima local es en calent al cors d'ambedoas còstas e a las planicias orientalas, del temps que las sèrras e las tèrras nautas pòdon èsser fòrça fredas. La vila pus granda de Colómbia es la siá capitala, Bogotà. Autras vilas importantas son Medellín, Cali, Cartagena, Barranquilla, Ibagué, Manizales, San Juan de Pasto, Cúcuta e Bucaramanga.
La diversitat etnica en Colómbia es un resultat de la barreja de amerindis indigènas, colons espanhòls e esclaus africans, causa qu'a produsit una mescla de mestís (48%), blancs (30%), mulats (14%), negras (4%) e una barreja negra-ameríndia (3%). Uèi, solament aperaquí 1% de las gents pòt èsser identificada coma totalament ameríndia sus la basa de la lenga e las costumas. La religion predominanta en Colómbia es lo catolicisme roman.
Per la populacion, Colómbia es lo tresen estat d'America Latina, après Brasil e Mexic. Lo movement de populacion rurala dins los airals urbans foguèt fòrt durant lo sègle XX. La populacion urbana aumentèt de 57% de la populacion totala en 1951 a aperaquí 74% cap a 1994. Trenta vilas an una populacion de 100 000 abitants o mai. Los nòus departaments de tèrras bassas de l'èst, que constituisson aperaquí 54% de la superfícia de Colómbia, an mens de 3% de la populacion e una densitat de mens d'una persona per quilomètre carrat.