Raël
.png)
Claude Maurice Marcel Vorilhon, dich Raël, nascut en Occitània a Vichèi (Auvèrnhe) lo 30 de setembre de 1946, es un jornalista, escrivan e predicator occitan francofòn, mai que mai conegut coma fondator e menaire de la religion ufologica dicha mouvement raëlien (movement raëlian), religion sovent puslèu considerada coma una sècta.
Biografia
[modificar | modificar lo còdi]Claude Vorilhon passa son enfança e una partida de son adolescéncia en Occitània, a Embèrt en Auvèrnhe.
Passionat de musica e de guitarra, s'installa en 1961 a París (França) ont i fa lo cantaire per carrièra. Puèi a l'escadença de jogar tanben dins de cabarets e cafès concèrts ont es remarcat pel celèbre productor francés de disques Lucien Morisse. Pren alavetz lo pseudonim de Claude Celler e comença de cantar a la ràdio dins un estili cançon francesa plan inspirat de Jacques Brel, qu'aima fòrça. En 1966, enregistra quitament un primièr single, seguit per qualques autres fins a 1970, annada de la mòrt de son productor Lucien Morisse.
Tornat en Auvèrnhe, deveng jornalista esportiu e fonda quitament en 1971 una revista d'espòrt automobil : Auto Pop. En novembre de 1973, pr'amor de la crisi petrolièra en seguida de la Guèrra de Kippur, lo governament francés decreta la defensa de las corsas automobilas pendent un an, çò qu'entraina una crisi per la revista de Claude Vorilhon.
Lo movement raëlian
[modificar | modificar lo còdi]Fin 1973, Claude Vorilhon comencèt de s'interessar a las questions ligadas als OVNIs. Afirma que lo ser del 13 de decembre de 1973, mentre que menava son auto còsta Clarmont d'Auvèrnhe, a vist un sieton volant aterrir de cap a el ; un extraterrèstre ne seriá sortit en li disent en francés qu'aviá un messatge per el. Claude Vorilhon declarèt que lo rencontre ambe los extraterrèstres que se fan apelar Elohim a durat sièis jorns, pendent los quals li an balhat un messatge per l'umanitat. Recebèt tanben d'eles lo nom novèl de Raël, que significa « messatgièr ».
En 1974, Claude Vorilhon abandona son trabalh de jornalista esportiu e escrich un libre sus las pretendudas revelacions qu'auriá recebut d'extraterrèstres, entitolat Le livre qui dit la vérité (Lo libre que ditz la vertat), dins lo qual afirma que los Elohims an creat la vida sus Tèrra gràcias a l'engèni genetic. La meteissa annada, balha una conferéncia publica a París (França) e fonda lo « Movement per l'acuèlh dels Elohims creators de l'umanitat ».
En 1975, publica un autre libre, Les extra-terrestres m'ont emmené sur leur planète, dins lo qual afirma èsser estat menat pels Elohims sus lor planeta.
En 1976, lo movement fondat per Raël càmbia de nom e ven lo Mouvement Raëlien (movement raëlian).