Cementèri militar alemand de La Cambe

Un article de Wikipèdia, l'enciclopèdia liura.
Salta a la navegació Salta a la cerca
German military cemetery Normandy 1.jpg

Lo cementèri militar alemand de La Cambe (cimetière militaire allemand de La Cambe en francés ; Deutsche Kriegsgräberstätte in La Cambe en alemand) es un cementèri alemand de la Segonda Guèrra Mondiala que si situa a La Cambe dins lo nòrd-oèst de Calvadòs. L'i enterrèron aperaquí 21 300 soudats alemands que morèron au moment dei combats de junh a aost de 1944 dins lo corrent de la Batalha de Normandia. Lo cementèri, d'una superficia de doas ectaras, s'acabèt en 1961 e s'inaugurèt en setembre dau meme an. Despuei, si retrobèron 700 còrs de soudats alemands en Normandia qu'enterrèron a La Cambe. Lo cementèri s'administra per lo Volksbund Deutsche Kriegsgräberfürsorge, la comission alemanda dei tombas de guèrra.

Inicialament, leis Americans enterrèron durant l'estiu de 1944 sus dos campàs adjacents de soudats americans e alemands a La Camba. Rapatrièron lei dos tèrç dei còrs americans ais Estats Units a la demanda dei familhas, e transferèron lo tèrç que sobrava dins lo cementèri american de Colleville-sur-Mer a quauquei quilomètres d'aquí. En 1954, après l'acòrdi franco-alemand sus lei tombas de guèrra, si decidèt de faire dau site de La Cambe un dei sièis cementèris alemands de Normandia. Coma aquò lei servicis dau Volksbund Deutsche Kriegsgräberfürsorge ramblèron, en mai dei soudats alemands ja enterrats sus lo site, mai de 12 000 mòrts que lei còrs si despartissián dins lei cementèris provisòris pertot en Calvadòs e Orne.

Lo tumulus centrau dau cementèri, dominat per una gròssa crotz de granit de 5 mètres d'aut, rambla quauquei soudats que sei noms son gravats sus de placas que s'atròban au pè d'aquest.

En 1958, La Cambe siguèt lo site dau premier camp de jovents organizat per lo Volksbund en França. Despuei aqueu moment, de joves participants sostenguts per de soudats de la Bundeswehr ajudan a l'entretenença dau cementèri.

Adjacent au cementèri, si bastissèt lo Jardin de la Paix (Jardin de la Patz) onte sus tres ectaras plantèron 1 200 agasts en simbòle de patz, cada finançat per un donator de país diferents.

Lo 5 de junh de 2009, dins lo quadre dau 65en anniversari dau Desbarcament, Lucien Tisserand, lo conservator dau cementèri despuei 1989, organizèt a la demanda de l'Ambaissada d'Alemanha en França una ceremònia que reünissèt entre 600 e 700 personas ambé de veterans francés, alemands e americans e de representants d'autres país Aliats que participèron a la Batalha de Normandia.

Si pòu apercebre lo cementèri despuei l'N13 (que jonhe Caen e Cherbourg) que passa just au nòrd dau cementèri.