Cefalopòde

Aqueste article es redigit en provençau.
Un article de Wikipèdia, l'enciclopèdia liura.

Lei cefalopòdes (Cephalopoda) son una classa de molluscs apareguts a la fin dau Cambrian i a aperaquí 500 milions d'ans. Son caracterizats per una tèsta dotada de tentaculs, egalament dichs braç. Aquel ensemble inclutz lei Coleoidea (porpres, tautenas, süpias) e lei Nautilida (nautils). En 2022, aperaquí, 800 espècias viventas èran estadas descrichas e de descubèrtas novèlas avián regularament luòc. En parallèl, au mens 11 000 espècias extinchas son estadas identifidas.

La preséncia de tentaculs prensils es l'element pus caracteristic dau clade. Pasmens, es pas l'unic trach distintiu. La tèsta contèn ansin un cervèu relativament desvolopat protegit per un crani cartilaginós. Leis uelhs dei cefalopòdes son perfeccionats, çò que li ofrís una bòna vision sosmarina, e la boca, dotada de muscles poderós e d'un bèc de quitina, es capable de trissar de materiaus durs. Enfin, un mantèu ventrau contractil e un sistèma de sifon muscular permèton de velocitats autas per se desplaçar ò per s'enfugir. Gràcias a aquelei caracteristicas, lei cefalopòdes actuaus son de predators marins que caçan de molluscs, de peis e de crustacèus. La talha d'aqueleis espècias varia de quauquei centimètres a mai d'un desenau de mètres.

Lei cefalopòdes son caçats per l'èsser uman dempuei l'Antiquitat coma o mòstra lei tradicions gastronomicas dei pòbles de l'espaci mediterranèu. Pasmens, en despiech d'una pesca intensiva, la màger part deis espècias semblan ben s'adaptar ais efiechs dau rescaufament climatic. Ansin, dempuei leis ans 1950, la proporcion de cefalopòdes es a aumentar dins leis oceans au destriment d'autrei familhas d'espècias aqüaticas.

Liames intèrnes[modificar | modificar la font]

Bibliografia[modificar | modificar la font]

Nòtas e referéncias[modificar | modificar la font]

  1. ITIS, consultat lo 28 janvier 2016