Carme Forcadell

Un article de Wikipèdia, l'enciclopèdia liura.
Salta a la navegació Salta a la cerca
Carme Forcadell a la Via Catalana.

Carme Forcadell i Lluís (Xerta, 1956) es una ensenhaira e politiciana catalana. Fondadora de la Plataforma per la Llengua, membre de la direccion d'Òmnium Cultural de Sabadell, e anciana presidenta de l'Assemblada Nacionala Catalana, es l'actuala presidenta del Parlament de Catalonha.

Biografia[modificar | modificar la font]

Carme Forcadell nasquèt dins una familha modèsta (son paire èra mecanician) a Xerta, un vilatge de la region de Tarragona, en 1956. Faguèt sos estudis primaris localament abans de partir per Tortosa ont passèt son bachelierat. Se diplomèt puèi en filosofia e sciéncias de la comunicacion a l'Universitat Autonòma de Barcelona e i obtenguèt tanben un mastèr en filologia catalana. Trabalhèt coma foncionària del Departament d'Educacion de la Generalitat de Catalonha a partir de 1985, abans de dintrar en 1992 coma coordinadora de normalizacion lingüistica dins lo Servici d'Ensenhament del Catalan del meteis Departament d'Educacion. Dempuèi 2004 es conselhièra (en catalan: assessora) en lenga, interculturalitat e coesion sociala del Vallès Occidental.

A publicat de material didactic divèrs, qualques libres de lengua e literatura, e tanben un diccionari. Collaborèt dins divèrses mejans de comunicacion que i escriguèt d'articles a prepaus de planificacion lingüistica, lenga e identitat. Es membre dempuèi mantes ans de nombrosas entitats, membre de la Comission de la Dignitat e sòcia de la Plataforma pel Drech de Decidir, ont participa a la comission de comunicacion. Es una militanta d'Esquèrra Republicana de Catalonha.

Durant l'estiu de 2012 coordinèt la marcha per l'independéncia dins tota Catalonha e, coma presidenta de l'Assemblada Nacionala Catalana, foguèt una de las voses màgers de l'organizacion de la manifestacion "Catalunya, nòu estat d'Euròpa" e la Via Catalana. Amb Muriel Casals, la presidenta d'Òmnium Cultural son implicacion dins l'organizacion e la gestion de la Via Catalana, que representèt un succès colossal quand amassèt l'11 de setembre de 2013 mai de 400 mil de personas, segon las estimacions de la polícia, ne fa una de las personas mai influentas dins l'avenidor geopolitic de Catalonha.

Lo 26 d'octobre de 2015 foguèt elegida presidenta del Parlament de Catalonha, amb 77/135 vòtes en favor.