Cabra dau Rove
La cabra dau Rove es una raça de cabra occitana originària dau vilatge dau Rove. Son pelatge es generalament castanh amb de tacas blancas ò negras. Pasmens, de variacions importantas existisson. Son trach pus caracteristic son sei banas lòngas, triangularas e torsadas. En lo mascle, pòdon agantar una longor de 1,2 m. Raça rustica, es ben adaptada ai climas arids car es capabla de valorizar una vegetacion fòrça paura[1].
Segon la legenda, es eissida de tropèus de cabras desbarcats per lei Fenicians ò per lei Grècs. Dins lei fachs, l'origina precisa de la raça es pauc clara. Avans l'industrializacion, èra utilizada per acompanhar lei tropèus de motons e provesir dau lach ai pastres e ais anhèus. Durant aqueu periòde, èra tanben una fònt de carn. Uei, es subretot utilizada per fabricar de fromatges, especialament la brossa dau Rove[2], e per entretenir de zònas d'accès malaisat dins lo quadre de la prevencion deis incendis. Après un periòde de declin a la fin dau sègle XX, leis efectius son en aumentacion amb 5 500 cabras recensadas en 2007 e 14 000 en 2014.
Liames intèrnes[modificar | Modificar lo còdi]
Bibliografia[modificar | Modificar lo còdi]
- (fr) Daniel Babo, Races ovines et caprines françaises, France Agricole Editions, 2000, pp. 295-298.
Nòtas e referéncias[modificar | Modificar lo còdi]
- ↑ En particular, s'ataca sovent ais arbrilhons. Fòrça impopular a temps passat, aquela caracteristica explica uei la popularitat de la cabra dau Rove per regular la vegetacion dins lei zònas desertificadas per l'exòdi rurau.
- ↑ Son lach pòu tanben intrar dins la fabricacion de pelardon, de picodon e de banon.