Batalha dei Mès

Un article de Wikipèdia, l'enciclopèdia liura.
Representacion deis insurgents republicans dei Mès en 1851 (dessenh anònim realizat vèrs 1851).

La batalha dei Mès se debanèt lo 8 de decembre dins lo corrent de l'insureccion republicana dau departament dei Basseis Aups còntra lo còp d'estat dau 2 de decembre de 1851. S'acabèt per una victòria efemèra dei republicans que foguèron obligats de se dispersar tre lo 9.

Acomençat lo 5 de decembre, lo movement aviá capitat de prendre Dinha lo 7 après la capitulacion de sa garnison. Après aquela desfacha e la formacion d'un Comitat departamentau de resisténcia per lei republicans, l'armada favorabla ai bonapartistas assaièt de reconquistar lei vilas perdudas. Un batalhon vengut de Marselha intrèt dins lo departament per la Vau de Durença e se turtèt ai Mès a una fòrça de 3 000 insurgents dirigits per Ailhaud de Vòus. Après dos assauts replegats, lei militars deguèron se retirar per defugir un enceuclament. Un vintenau de soudats e dos oficièrs foguèron capturats. Maugrat quauquei bleçats, la batalha faguèt ges de mòrt.

Après lo combat, lei presoniers donèron d'informacions ais insurgents qu'èran sensa novèla deis eveniments qu'avián luòc dins lo rèsta dau país onte lei bonapartistas èran venceires. En causa de son isolament, lei caps republicans aupencs decidèron donc d'ordonar la dispersion tre lo 9. Quauqueis actes de resisténcia isolada aguèron encara luòc per la seguida mai la segonda ofensiva de l'armada trobèt ges de resisténcia importanta[1]. Totei lei vilas e lei vilatges ocupats per l'insureccion foguèron reconquistats lo 15. Ambé 300 partisans, Ailhaud de Vòus menèt d'accions de guerilha fins a genier avans d'èsser obligat d'abandonar tornarmai lo combat en causa de la manca de viures. Foguèt arrestat a Marselha dins lo corrent dau mes en assaiant de s'enfugir en Itàlia. La repression foguèt dura amb aperaquí 1 700 personas que deguèron faciar d'acusacions de participacion a l'insureccion e l'ocupacion dau departament per l'armada.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]

  1. Entre 6 e 9 insurgents foguèron fusilhats lo 14 de decembre dins la region de Sant Estève deis Òrgues.