Batalha de Shiloh

Un article de Wikipèdia, l'enciclopèdia liura.
Situacion generala de la Guèrra de Secession durant lo periòde de la batalha de Shiloh.

La batalha de Shiloh se debanèt dau 6 au 7 d'abriu de 1862 durant la Guèrra de Secession (1861-1865). Opausèt leis armadas unionista dei generaus Ulysses S. Grant e Don Carlos Buell (67 000 òmes) ai tropas dei generaus confederats Albert S. Johnston e P. G. T Beauregard (45 000 òmes). S'acabèt per una victòria nordista.

La batalha foguèt la consequéncia d'una temptativa sudista per s'opausar a la conquista de Tennessee per lo Nòrd. Un autre objectiu dei Confederats èra d'empedir leis Unionistas d'agantar Mississipí. Per aquò, lei Sudistas organizèron una ataca suspresa còntra lei fòrças de Grant avans l'arribada d'un important renfòrç menat per Buell. Lei Nordistas deguèron recular mai capitèron d'organizar una posicion defensiva sostenguda per plusors pèças d'artilhariá. Lo generau Johnston foguèt tuat durant aquelei combats e remplaçat per Beauregard. Aqueu darrier organizèt una ofensiva novèla mai Grant mantenguèt sa posicion. Lo 7, l'arribada dei tropas de Buell obliguèt lei Confederats d'ordonar la retirada vèrs lo sud. Espaventats per sei pèrdas, lei Nordistas assaièron pas de lei perseguir.

Lei pèrdas dau combat foguèron considerablas amb la neutralizacion de 13 000 soudats nordistas (au mens 1 750 tuats) e de 10 700 combatents sudistas (au mens 1 700 mòrts). La batalha de Shiloh foguèt ansin la batalha pus saunosa de l'istòria estatsunidencas fins a la batalha de Gettysburg en abriu de 1863. Jutjat responsable dau chaple, Grant foguèt relegat dins un comandament segondari onte demorèt durant quauquei mes.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]