Batalha d'Okehazama
La batalha d'Okehazama se debanèt en mai o en junh de 1560. Opausèt l'armaa dau clan Imagawa dau daimio Imagawa Yoshimoto (20 000-45 000 òmes) a las fòrças dau clan Oda menaas per Oda Nobunaga (3 000-4 000 òmes). Imagawa Yoshimoto, un dels senhors mai poderós de Japon, revendicava lo títol de shogun e menava una campanha en direccion de Quiòto, la capitala imperiala. Lo clan Oda èra una familha feodala menora que son territòri èra situat sus lo chamin chausit per Imagawa Yoshimoto. Son chef, Oda Nobunaga, refusèt de se sometre e organizèt una ataca suspresa per tuar son adversari e dispersar son armaa.
L'operacion èra riscaa, mas foguèt favorizaa per una chavana. De mai, las fòrças Imagawa èran pas gropaas car crenhavan pas una ataca. Imagawa èra ansin unicament protegit per una garda de 5 000 òmes. L'assaut d'Oda Nobunaga foguèt una suspresa completa e sas tropas capitèron de chaplar Imagawa Yoshimoto e 3 000 combatents Imagawa. Aquò entraïnèt la retiraa e la dispersion de la resta de las fòrças Imagawa.
Fòrça afeblit, lo clan Imagawa intrèt dins un periòde de declin marcat per la revòuta de plusors vassaus. Deuguèt ansin abandonar sas revendicacions politicas e se sometre au clan Tokugawa. Per Oda Nobunaga, aquela victòria marquèt lo començament d'una tiera de succès militars que li permetèron d'unificar una importanta partia de Japon.
Ligams internes
[modificar | modificar lo còdi]Bibliografia
[modificar | modificar lo còdi]- (en) Les Paterson, Oda Nobunaga: The Battle of Okehazama, Jetlag Press, 2008, 144 p.
Nòtas e referéncias
[modificar | modificar lo còdi]