Batalha d'Iwo Jima
La batalha d'Iwo Jima (en japonés: 硫黄島の戦い) se debanèt dins lo corrent de la Segonda Guèrra Mondiala dau 19 de febrier au 26 de març de 1945. Foguèt la consequéncia d'una ofensiva estatsunidenca (70 000 òmes) còntra Iwo Jima defenduda per l'armada imperiala japonesa (22 000 òmes). L'objectiu èra la conquista dei basas aerianas de l'illa per leis utilizar dins l'encastre de la campanha de bombardaments aerians còntra Japon. Gràcias a un ret estendut de fortificacions (18 km de tunèu), lei defensors capitèron de resistir mai d'un mes e d'infligir de pèrdas importantas ais asalhidors que perdiguèron 26 500 òmes (6 821 tuats, 19 189 bleçats e 494 dispareguts). Un pòrta-avions d'escòrta foguèt tanben aprefondat per de camicazes. Refusant de capitular, la garnison foguèt exterminada ò se suicidiguèt (20 703 mòrts, 1 152 dispareguts e solament 216 presoniers).