Batalha d'Òmdurman

Un article de Wikipèdia, l'enciclopèdia liura.
Representacion de la batalha d'Òmdurman que mostra l'eficacitat deis armas britanicas e l'impossibilitat per lei dervís madistas de s'aprochar de seis enemics.

La batalha d'Òmdurman se debanèt lo 2 de setembre de 1898 en Sodan e opausèt lei fòrças angloegipcianas dau generau Horatio Kitchener ai tropas dau califa madista Abdallah al-Taaishi. S'acabèt per una victòria majora de l'armada britanica que capitèt d'infligir de pèrdas importantas a son adversari e d'ocupar la region centrala de Sodan.

L'acarament entre lei doas armadas acomencèt a l'auba 11 km au nòrd de Khartom. Leis Angloegipcians dispauvan de 26 000 òmes compres un còrs de 8 000 soudats britanics fòrça ben equipats (mitralhièras, pèças d'artilhariá, fusius modèrnes... etc.). En fàcia, lei Madistas alinhavan aperaquí 52 000 òmes equipats d'armas ancianas. Lo debanament de la batalha es generalament depintat coma un chaple car l'infantariá madista foguèt incapabla de s'aprochar a mens de 50 m dei trencadas britanicas mai refusèt lòngtemps d'abandonar lo prat batalhier. Lei dervís dau califa Abdallah al-Taaishi foguèron donc tuats ò bleçats a distància per leis armas britanicas qu'avián una portada pus importanta sensa poder organizar de repòsta significativa. A la fin de la matinada, la màger part dei formacions madistas èran estadas decimadas ò dispersadas e lei subrevivents foguèron finalament obligats de se retirar permetent ais Angloegipcians d'intrar en Khartom.

Lei pèrdas angloegipcianas foguèron de 47 tuats e de 382 bleçats còntra aperaquí 10 000 mòrts, 5 000 presoniers e 13 000 bleçats dins lei rengs de l'armada madista que foguèt definitivament destrucha l'annada seguenta a la batalha d'Umm Diwaykarat. Aquela victòria permetèt ai Britanics d'establir sa preséncia en Sodan e d'i acomençar la formacion dau Condominium Angloegipcian que demorèt en plaça fins a 1956.

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]