Avenc d'Ornhac

Un article de Wikipèdia, l'enciclopèdia liura.
Anar a : navigacion, Recercar
La sala superiora
La segonda sala roja

L'Avenc d'Ornhac, en Bas Vivarés, alh sud delh plan calcari de las Gòrjas d'Ardecha, es una reputada bauma sosterranha.

Descripcion[modificar | modificar la font]

La prumièira sala mesura 125 m de lòng per una larjor de 90 m e una nautor de 30 m, siá una superfícia d'aperaquí una ectara.

Nauta de 17 a 40 m, lònja de 250 m e larja de 125 m, la sala superiora possedís d'estalagmitas espectaclosas. Las pus gròssas, alh centre, mòstran d'excrescéncias que lhors balhan l'aspècte de pinhas. An pas pogut, a causa de la nautor de la vòuta, se soudar a las estalactitas per formar de colomnas, mas son vengudas pus espessas a la basa, atenhant tot còp un diamètre fòrça grand. D'autras, pus recentas e pus greulas, en forma de plats apilats, las sobremontan. Alh contorn de la sala se remarcan de colomnetas freulas. D'unas an atengut una nautor importanta; d'unas en baioneta, d'autras fòrça dreitas. Dinc la Sala delh Caòs, encombrada de concrecions tombadas de la sala superiora, de magnficas drapariás de coloracions variadas s'eschapan d'una fendilha de la vòuta. Alh nivèu delh mirador de la prumièra sala roja, las aigas d'infiltracion enriquidas en carbonat de calci per la traversada delh jaç calcari, an permés a las concrecions de se multiplicar. Près, lo potz interior pus prigond de l'avenc (34 m) condutz a una sala rebonduda aumens 180 m.

Istoric[modificar | modificar la font]

Avans 1935, los vilatgeses, chaçaires e pastres locaus, coneissián l'existéncia d'un cròs près d'Ornhac. En agost de 1935, alh cors d'una exploracion sistematica de las baumas situadas alh sud de las Gòrjas d'Ardecha, una còla d'espeleològs dirigida per Robert de Joly arribèt dinc lo vilatge. Menats a l'intrada delh cròs per los vilatgeses, los cinc espeleològs franquiguèron la verticala de 50 m delh potz d'intrada amb l'ajuda d'eschalas de còrda en tot descubrir de salas gigantescas e de fòrça divèrsas formacions cristallinas.