Albert d'Unha

Un article de Wikipèdia, l'enciclopèdia liura.
Salta a la navegació Salta a la cerca

Albert d'Unha (Unha, Naut Aran, Val d'Aran) siguec un sant legendari, venerat localaments coma patron des segadors.

Legenda[modificar | modificar la font]

Era tradicion ditz qu'Albert ère hilh deth pòble d'Unha, ena Val d'Aran. Ère segador e fòrça devòt: coma recompensa divina, eth solei segaue mès forment qu'es sòns companhs plegadi; açò hège que li auessen enveja e li hessen males passades, mès tostemp se ne gessie ben. Un còp que la percaçauen, arribèc en arriu Garona e volec trauessar-lo; com qu'eth barquer ère d'acòrd damb es auti segadors, non volie passar-lo: Albert prenec eth sòn capèl e lo lancèc ar arriu, s'i metec dessús sòn e trauessèc er arriu sense problèmes. Per açò, tanben siguec invocat pes barquers.

Partic, mès, e deishèc era val entà anar tath Gironès, a on tanben siguec segador. Tanben i siguec envejat pes auti segadors, que lo heren dehòra a còps de pèira. En hugir, arribèc en un arriu shut; era legenda transmetuda per Joan Amades ditz qu'eth sant pishèc ath lhet der arriu e se hec un cabau tan abondiu qu'eth nau arriu detenguec es sòns perseguidors: dempús de semes, er arriuet arrecep eth nòm de Unyà (ara escrit Onyar), a causa dera procedéncia deth sant.

Sant Albert d'Unha ère venerat, peth sòn mestièr, coma sant patron des segadors, e se celebraue eth dia 13 de mai.