Wakfu (seria animada)

Un article de Wikipèdia, l'enciclopèdia liura.
Anar a : navigacion, Recercar

Wakfu es una seria animada francesa en 55 episòdis de 22 minutas producha per Ankama e France Télévisions destinada a un public jove e adolescent. Sa premiera difusion se debanèt entre lo 30 d'octòbre de 2008 e lo 3 de març de 2012 sus France 3. Son racònte es centrat sus leis aventuras d'un adolescent orfanèu, e de seis amics, a la recèrca de seis originas. L'Univèrs de l'intriga es un monde fantastic e magic s'inspirant dei jòcs videojòcs de ròtle Dofus e Dofus Arena. A l'ora d'ara, la seria es devesida en doas sasons. Chasca sason tèn sa sieuna intriga centrala formada per la lucha dau grop d'eròis còntra un enemic principau menaçant de destrurre lo monde. Una seguida es publicada sota la forma d'un manga.

Desvolopament de la seria[modificar | modificar la font]

Univèrs e concèptes de Wakfu[modificar | modificar la font]

Lo wakfu[modificar | modificar la font]

Lo wakfu es una energia magica primordiala dau monde e cada persona pòu l'utilizar. Sa natura es desconeguda mai certanei personas pensan qu'es una forma d'energia collectiva a la fauna e a la flora. Existís una energia opausada dicha stasis qu'es liada a la destruccion.

Lo Monde dei Dotze[modificar | modificar la font]

Personatges[modificar | modificar la font]

Eròis[modificar | modificar la font]

  • Yugo (votz : Fanny Bloc) qu'es lo protagonista principau dau racònte. Orfanèu au començament dau racònte, es lo fiu adoptiu d'Alibert, aubergaire dau vilatge d'Emelka. Es un adolescent optimista, intrepid e galejaire. Es tanben un cosinier talentuós gràcias a l'ensenhament de son paire adoptiu. Tèn de poders basats sus la creacion de portaus de teleportacion, la visualizacion dau wakfu e la creacion d'un jet poderós d'energia. La descubèrta progressivas de seis originas es un ponch centrau deis intrigas de la seria. Ansin, dins lo corrent de la premiera sason, Yugo descuerb que tèn un fraire dragon dich Adamaï e que fa partida dau pòble eliatrop, nom que vèn d'una civilizacion fòrça anciana e dispareguda. Pauc a pauc, apren tanben de mestrejar sei poders per luchar còntra lei plans de Nox. Durant la segonda sason, Yugo capitèt finalament de descubrir son pòble e son istòria. Dins lo corrent de sa lucha còntra Qilby, descuerb tanben qu'es lo rèi deis Eliatrops.
  • Amalia Sheram Sharm (votz : Adeline Chetail) qu'es una princessa e la filha dau rèi dau pòble sadida. Au començament dau racònte, tèn un caractèr de còp capriciós en causa de sa vida facila a la Cort de son paire. Son amic unic es Evangelyne que foguèt sa damisèla de companhiá e es d'ara endavant son gardacòrs. Tèn lo poder de parlar ai plantas e mestreja tanben una magia basada sus la creissença accelerada de vegetaus. Son pantais es de quitar lo palais sadida per partir a l'aventura. Ansin, au començament de la seria, a fach un plantier e va decidir de seguir e d'ajudar Yugo dins sa quista. Rintra dins son país a la fin de la premiera sason per avisar son paire dau projècte d'ataca dau reiaume sadida organizat per Nox. Au començament de la segonda sason, Amalia ocupa oficialament son reng de princessa. Pasmens, va se jónher a Yugo per l'ajudar tornarmai dins sei recèrcas.
  • Ruel Stroud (votz : Patrick Béthune) qu'es un enutrof, es a dire un aventurier estrech e desirós de s'enriquir lo pus possible. Ruel es donc un personatge vièlh qu'a agut fòrça mestiers diferents dins sa vida coma cercaire de tesaurs, caçaire de primas, entraïnador d'una equipa de Bofbowl, marchand o guida. Tèn una fortuna fòrça importanta esconduda dins son ostau e protegida per divèrsei lecas e defensas magicas. Maugrat son temps, es encara fòrça viu e pòu faire de sa pala magica una arma dangeirósa. Au començament dau racònte, es lo melhor amic d'Alibert e accepta donc naturalament d'ajudar Yugo dins sei quistas.
  • Evangelyne (votz : Geneviève Doang), generalament dicha Eva, qu'es una arquiera cra e lo gardacòrs d'Amalia pendent la premiera sason. Es una adolescenta calculada, pacienta e sangflaca. Son poder li permet d'invocar de sagitas magicas a partir de son arc. Son educacion militara dèu èstre relativament avançada car tèn un sens tactic e un sens dau dever fòrça importants. A tanben recepuda una educacion regardant l'etiqueta de la Cort. Sei parents son desconegudase e tèn una sòrre cadeta dicha Cléophée. Dins lo corrent de la premiera sason, vèn pauc a pauc amorósa de Tristepin. Es donc fòrça afectada per sa disparicion durant la batalha còntra Nox. Au començament de la segonda sason, Evangelyne e sa quista per retrobar e liberar Tristepin son donc lo nos centrau de l'intriga. Per la seguida, es oficialament en pareu ambé Tristepin e ajuda tornarmai Yugo dins la lucha còntra Qilby e Tristepin dins sa lucha còntra Rushu. Es prens a la fin de la segonda sason.
  • Tristepin de Percedal (votz : Thomas Guitard), generalament dich Pinpin, qu'es un chivalier iop adolescent e gardian d'un demon, dich Rubilax, blocat dins son espasa. Es a dire qu'es un combatent robust que sa tactica unica es de cargar son enemic e que pòu destriar solament lo Ben e lo Mau. Pòu fusionar ambé son demon per aumentar sa fòrça. Pasmens, existís un risc que Tristepin perde lo contraròtle de son còrs. Aqueu risc es fòrça frequenta au començament dau racònte e va disparéisser a la fin de la premiera sason. Dins lo corrent de la premiera sason, va ajudar Yugo dins sa quista e venir pauc a pauc amorós d'Evangelyne. Pasmens, durant la batalha dins lo reiaume sadida, dèu se sacrificar per sauvar Amalia e son gardacòrs. Au començament de la segonda sason, se descuerb qu'es vengut presonier de son espasa. Dins aquò, es capable de cridar Evangelyne a l'ajuda. Sa liberacion marca lo començament oficiau de sa relacion ambé l'arquiera. Dins lo rèsta de la sason, ajuda Yugo dins sa quista e lucha còntra l'invasion de Rushu.

Aliats principaus[modificar | modificar la font]

  • Adamaï (votz : Dorothée Pousséo) qu'es lo fraire dragon de Yugo. Foguèt educat e protegit per Grougaloragran. Ansin, es una fònt d'informacion importanta per Yugo a prepaus de sei poders e de l'istòria dau pòble eliatrop.
  • Alibert (votz : Thierry Mercier) qu'es lo paire adoptiu de Yugo e lo melhor amic de Ruel. Es l'aubergaire dau vilatge d'Emelka e un cosinier talentuós.
  • Az qu'es un tofu e l'animau de companhiá de Yugo.
  • Cléophée (votz : Maryne Bretieaux) qu'es la sòrre d'Evangelyne. Gelosa de sa sòrre, fa un plantier de la ciutat cra dins lo corrent de la segonda sason per venir tant famosa que sa sòrre ainada. Maugrat l'oposicion d'Evangelyne, capita de jónher lo grop deis eròis e sa preséncia va provisòriament ensornir lei relacions entre Evangelyne e Tristepin. Pasmens, la batalha finala de la sason permet una reconciliacion entre lei doas sòrres.
  • Elaine (votz : Claire Baradat) qu'es la filha dau capitani dau naviri utilizat per leis eròis durant la segonda sason.
  • Grougaloragran (votz : Benoît Allemane) qu'es un dragon protector de Yugo e d'Adamaï. Es tuat durant un combat còntra Nox mai se reïncarna tre la segonda sason.
  • Goultard (votz : Bruno Choel) qu'es lo mèstre de Tristepin. Ajuda Tristepin per mestrejar Rubilax e participa a la batalha finala còntra Rushu.
  • Mèstre Joris (votz : Yoann Sover) qu'es un ambaissador dau rèi de Bonta. Es tanben un combatent robust e fòrça eficaç.
  • Rubilax (votz : Gérard Surugue) qu'es lo demon blocat dins l'espasa de Tristepin. Durant la premiera sason, es capable de prendre lo contraròtle dau còrs de son gardian per faire lo Mau. Pasmens, es finalament vencut per Tristepin a la fin de la premiera sason e lei relacions entre lei dos van se melhorar. Ansin, Rubilax sauva Tristepin après son sacrifici pendent la batalha còntra Nox. Pasmens, decidís d'estremar Tristepin dins l'espasa e d'assaiar de liberar lo rèi dei demons. La quista de liberacion menada per Evangelyne permet de descubrir que Rubilax es en realitat un demon pas necessàriament marrit. Ansin, accepta finalament de rintrar dins son espasa e Rubilax va pauc a pauc ajudar leis eròis de bòn grat.
  • Prince Armand (votz : Cédric Dumond) qu'es lo fiu dau Rèi Sadida e lo fraire d'Amalia. Es un bòn combatent e un fraire atencionat sota un aspèct sevèr e arrogant. Es amorós d'Evangelyne e sei relacions ambé Tristepin son donc marridas.
  • Rèi Sadida (votz : Philippe Dumond) qu'es lo rèi dau pòble sadida.

Enemics principaus[modificar | modificar la font]

  • Anatar (votz : Antoine Tome) qu'es un demon presonier de la fortalesa dei Chivaliers Justiciá e lo luòctenent principau dau rèi demon Rushu. Son poder es d'absorbir lo poder de seis advèrsaris per contacte.
  • Nox (votz : Benjamin Pascal) qu'es l'enemic principau de la premiera sason. Dos cents ans avans lo començament de l'intrigi, descubiguèt un artefact eliatrop fòrça poderós dich Eliacube. Aquel objèct venguèt alora lo centre de sei preocupacions entraïnant la partença de sa frema e de seis enfants. Desesperat per aquela separacion, venguèt fòl après lor mòrt. Acomencèt d'auvir l'Eliacube li parlar. Gràcias a l'artefact, decidiguèt d'assaiar de remontar lo temps per corregir seis errors. Per aquò, ataca donc lei creaturas e la natura per concentrar la quantitat fòrça importanta d'energia (wakfu) necessària a son plan. A la fin de la premiera sason, ataca donc lo reiaume sadida per prendre lo contraròtle de l'Aubre de Vida, fònt de wakfu dau pòble sadida. Après mai d'un combat, compren finalament que podriá jamai agantar lo nivèu d'energia sufisent. Abandona lo prat batalhier e son esperit s'esbriga entraïnant sa mòrt sus lei tombas de sa familha.
  • Qilby (votz : Erik Colin) qu'es un eliatrop e lo rèi ancian d'aqueu pòble. Fòrça poderós, garda lei remembranças de sei reincarnacions au contrari dau rèsta deis Eliatrop. Dins lo passat, assaièt de rebutar Yugo de la reiautat. Per aquò, entraïnèt una guèrra que s'acabèt per la disparicion de la màger part dau pòble eliatrop. Finalament vencut, foguèt exilat dins una dimension parallèla. Dins lo corrent de la segonda sason, es liberat per Yugo e Adamaï. Assaia alora de liberar sa sòrre dragona. Per aquò, forma una aliança ambé lo rèi dei demons per eliminar lo dragon gardian de sa sòrre. Pasmens, es finalament vencut per Yugo e tornarmai exilat dins sa dimension parallèla.
  • Remington Smisse (votz : David Kruger) qu'es un raubaire colleccionant leis objèctes abitats per de demons. L'acarnament d'Evangelyne de retrobar l'espasa ont èra blocat Tristepin au començament de la segonda sason l'a persuadit qu'aquela arma èra fòrça poderosa. Es donc fòrça desirós de se'n emparar, ço que va entraïnar una tièra d'afrontaments amb Evangelyne e Tristepin.
  • Rushu (votz : Marc Alfos) qu'es lo rèi dei demons. Son pensament principau es la destruccion. A la fin de la segonda sason, assaia d'envaïr lo monde gràcias a l'ajuda de Qilby mai son assaut es finalament replegat.

Ligams extèrns[modificar | modificar la font]

  • Site oficiau de la seria : [1].