Stanisław Konarski
Stanisław Konarski (del nom vertadièr èra Hieronim Franciszek Konarski, Żarczyce, 30 de setembre de 1700 - Varsòvia, 3 d'agost de 1773), èra un pedagòg polonés, un teorician de l'educacion, un escriveire politic, un poèta, un dramaturg, un monje e lo precursor principal de l'Illustracion en Polonha.
De 1725 a 1727 Konarski estudièt al Collegium Nazarenum de Roma, qu'i venguèt professor de retorica. Après, viatgèt en França, Alemanha e Àustria. En 1730 tornèt en Polonha e comencèt un trabalh sus un recuèlh novèl de la legislacion polonesa (Volumina legum).
De 1736 Konarski èra mètre al Collegium Resoviense en Rzeszów e en 1740 fondèt lo Collegium Nobilium, una escòla elitista de Varsòvia per enfants de las personas de nautas classas socialas ("szlachta"). D'arrèu, reformèt las Escòlas Pías en Polonha, d'acòrd ambé son programa educatiu (Ordinationes Visitationis Apostolicae..., 1755). Sas reformas foguèron un punt important dins la lucha del sègle XVIII per modernizar lo sistema educatiu polonés.
Al començament, Konarski èra associat politicament ambé lo rei Stanisław Leszczynski; pus tard, se liguèt a la "Familha" de Czartoryski e lo rei Stanisław II Poniatowski, participant als notables "sopars de dijòus". Estanislau II Poniatowski faguèt batre una moneda en l'onor de Konarski, ambé son efigia e l'inscripcion latina Sapere auso.