Solstici
Un article de Wikipèdia, l'enciclopèdia liura.
Lo solstici es cadun dels dos moments de l'an que lo Solelh atenh la declinason maximala (distància angulara maximala) respècte a l'eqüator celestial.
I a dos solsticis dins l'an,
- Pel solstici d'estiu lo solelh se tròba a la posicion mai septentrionala (mai al nòrd), es a dire, sul tropic de Cancer, a +23°26' de declinason. Fisicament, lo solstici d'estiu correspond al moment que l'ais de rotacion de la Tèrra se tròba mai pròche de la direccion Tèrra-Solelh. Aquò se produís entre lo 20 e 21 del mes de junh (la data e l'ora exactas varian cada an)
- Pel solstici d'ivèrn lo Solelh se tròba a la posicion mai meridionala (mai al sud), aquò es, sul Tropic de Capricòrn, a -23°26' de declinason. Fisicament, lo solstici d'ivèrn correspond al moment que l'ais de rotacion de la Tèrra se tròba mai aluenhat de la direccion Tèrra-Solelh. Aquò arriba entre los 21 e 22 del mes de decembre (la data e l'ora exactas tanben varian, logicament, cada an).
Lo solstici d'estiu marca lo passatge de la prima a l'estiu, alara que lo solstici d'ivèrn marca lo passatge de la tardor a l'ivèrn. Dins l'emisfèri sud, se sona solstici d'estiu lo solstici del mes de decembre e solstici d'ivèrn lo solstici del mes de junh, prenent aicí en compte de la diferència d'estacions entre los dos emisfèris.
