Saut de naut

Un article de Wikipèdia, l'enciclopèdia liura.
Anar a : navigacion, Recercar


Saut d'Yelena Slesarenko en Fosbury-flop

Lo saut de naut es una espròva d'atletisme qu'a per objectiu de subrepassar una barra orizontala, plaçada a una auçada determinada entre dos supòrts verticals separats de 4 mètres.

Lo sautaire comença la competicion a l'auçada qu'estime oportuna e dispausa de tres assages per la superar.


Lo recòrd del monde actual de la disciplina es detengut pel cuban Javier Sotomayor amb un saut de 2,45 m en 1993. Lo recòrd feminin es detengut per la bulgara Stefka Kostadinova amb un saut de 2,09 m en 1987 a Roma durant los Campionats del monde d'atletisme.

Reglamentacion[modificar | modificar la font]

L'atleta que passa la barra pus nauta rempòrta lo concors. Los concurrents an lo drech de prendre de vam. La barra es montada per palièr (de 5 cm en 5 cm a la debuta de la competicion, puèi de 3 en 3 cm), cada concurrent ajant drech a tres ensages a cada nautor prepausada. Dempuèi qualques annadas, la tactica faguèt son aparicion: quand un sautaire a macat son primièr ensag (o sos dos primièrs ensages) a una nautor determinada, pòt servar sos dos ensages (o son darrièr ensag) a la nautor seguenta.

Tecnicas de saut de naut[modificar | modificar la font]

Cisèl[modificar | modificar la font]

Lo metòde del cisèl.

L'atleta sauta en enauçar la primièra gamba e quand es passat, enauça l'autra en tornar caire.

Rotlèu costal[modificar | modificar la font]

L'atleta ataca la barra de fàcia e sauta a l'orizontala, sul costat, la gamba d'apèl plegada jos el. Aquela tecnica limita fòrça lo marge de progression del fach que i pas de rotacion del còrs a l'entorn de la barra coma l'autorisa la tecnica seguenta. Pasmens limitava l'estress ligat a la casuda a una epòca que la recepcion se fasiá mai que mai dins la sabla.

Rotlèu ventral[modificar | modificar la font]

L'atleta ataca l'obstacle lateralament en s'enrodan literalament a l'entorn de la barra, a l'orizontala. Lo problèma d'aquela tecnica èra lo desgatjament de la gamba d'apèl per dessús de la barra. Demandava de qualitats de gimnast esprovadas que sol lo rus Valeriy Brumel saupèt portar, dins los ans 1960, a son punt mai naut en establir lo recòrd del monde à 2,28 m. Cal encara senhalar Vladimir Yashchenko que, mentre que lo Fosbury èra adoptat per totes los autres sautaires, s'enaucèt a 2,33 m lo 3 de julhet de 1977, puèi 2,34 durant l'estiu de 1978 en rotlèu ventral, en batre aital l'ancian recòrd del monde détengut pel mitic Dwight Stones l'òme que passèt pel primièr còp la barrièra dels 2,30 m. Es amb Yashchenko que va desapareisser de las tauletas dels recòrds del monde la tecnica del rotlèu ventral.

Fosbury-flop[modificar | modificar la font]

Le Fosbury-flop es la tecnica mai utilizada a l'ora d'ara. Foguèt utilizada pel primièr còp en competicion internacionala als Jòcs olimpics d'estiu de 1968 per Dick Fosbury. Consistís a arribar d'esquina a l'obstacle e a sautar d'esquina, en levar las doas gambas en darrièr per dessús de la barra. Lo saut foguèt refusat dins un primièr temps, acceptat puèi après verificacion que cap reglament èra pas estat enfranhut. Dick Fosbury passèt aquete jorn 2,24 m, nòu recòrd olimpic. Dick Fosbury foguèt medalhat d'aur[1].

Pus tard, foguèt provat que Fosbury es pas estat lo primièr de far servir aquela tecnica, sens o saupre. Bruce Quande foguèt fotografiat en 1963 passant la barra d'esquina.

Recòrds del monde[modificar | modificar la font]

Recòrds del monde actuals de saut de naut
Region Genre Performància Atleta Data Luòc
En plen aire M 2,45 m Cuba Javier Sotomayor 27 de julhet de 1993 Salamanca
F 2,09 m Bulgaria Stefka Kostadinova 30 d'agost de 1987 Roma
En sala M 2,43 m Cuba Javier Sotomayor 4 de març de 1989 Budapèst
F 2,08 m Suècia Kajsa Bergqvist 4 de febrièr de 2006 Arnstadt

Referéncias[modificar | modificar la font]

  1. Vidèo de Dick Fosbury als Jòcs olimpics sur olympic.org. Consultat lo 18 d'agost de 2013