Richard Nixon

1. REDIRECT Modèl:Infobox Identitat

Richard Milhous Nixon, avocat, òme politic, foguèt president dels Estats Units d'America entre 1969 e 1974. A causa de l'escandal del Watergate, deguèt demissionar abans la fin de son mandat.

En 1968, lo republican Richard Nixon ganhèt las eleccions presidencialas, e d'aquela manièra culminava lo sieu camin cap al poder, qu'aviá iniciat amb la desbranda davant John Fitzgerald Kennedy, uèch ans enrè. Aparentament, lo nòu president èra un politic de linha dura. Lo plan de Nixon s'apiejava sus doas linhas d'accion:

• "Vietnamizar la guèrra de Vietnam." Es a dire, tornar als vietnamians del Sud la "siá" guèrra, en tirant los soldats americans e daissar al govèrn de Saigon lo material militar utilizat.

• Pachar amb lo govèrn del Vietnam del Nòrd per una sortida negociada del conflicte. Per aiçò, Nixon e lo sieu secretari d'estat, Henry Kissinger, decidiguèron un doble aprochament de las doas superpoténcias de l'Èst, qu'en aquel moment èran afrontadas: la Republica Populara de China e l'URSS.

La manòbra pretendiá provocar l'aproximacion sovietica a partir de l'interès american per la China. Henry Kissinger viatgèt secretament a Pequin en 1971, Washington reconeguèt diplomaticament lo regim comunista chinés e l'an seguent foguèt Nixon meteis qual s'entrevistèt amb Mao Zedong, en febrièr. Lo mes de mai, lo president nòrd-american se transportèt a Moscòu e signèt los primièrs acòrdis SALT, lo SALT I, per la limitacion de l'armament estrategic nuclear.

Coma resultat d'aquelas manòbras, a la tardor de 1972 los nòrd-americans arribèron a d'acòrdis solids amb lo regim de Vietnam del Nòrd, que permetèron d'abandonar la guèrra amb un minim de dignitat. Al començament de 1973 demoravan pas mai de tropas regularas de combat americanas en Vietnam del Sud. Mas, subretot, en un temps brèu avián capitat de pausar las basas de la détente, o distension, un assag per recondusir la guèrra Freja cap a de camins diplomatics e aluenhar la trèva d'una brega generalizada.

Aqueles succèsses assegurèron a Nixon la siá reeleccion lo 1972. Mas durant la campanha electorala se descobriguèt per azard un episòdi d'espionatge politic al quartièr general del Partit Democrata (la bastissa Watergate); dos reportaires del jornal The Washington Post lo faguèron esclatar e se desencadenèt un escandal politic quand se descobriguèt que d'òmes de l'entorn dirècte del president èran implicats dins l'afar. L'acumulacion de pistas designèron Nixon el meteis, que demissionèt en agost de 1974, un fach sens precedents en l'istòria nòrd-americana. Lo còp foguèt terrible e la fisança dels nòrd-americans en las siás institucions mermèt clarament.

Precedit per Lyndon Johnson

President dels Estats Units 1969 - 1974

Seguit per Gerald Ford