Ramon Rogièr Trencavel

Escut de la dinastia Trencavel

Ramon Rogièr Trencavel(1185 - 10 de novembre 1209) es un membre de l'Ostal de Trencavel. Èra vescomte d'Albi e de Besièrs (infeodat al comte de Tolosa), e vescomte de Carcassona e de Rasès (infeodat al comte de Barcelona qu’èra dins lo meteis temps rei d'Aragon). Foguèt un dels eròis e en meteis temps una de las primièras victimas de la Crosada dels Albigeses.

Familha

Ramon Rogièr es lo filh de Rogièr II Trencavel e d'Azalaís de Tolosa, e lo nebot de Ramon VI de Tolosa. Esposèt Agnès de Montpelhièr. De lor union nasquèt un filh: Ramon II Trencavel.

Començament del règne

Raimon Rogièr viviá al castèl comtal de Carcassona que foguèt construch per sos aujòls al sègle XI. Mentre qu'èra pas catar, Raimon Rogièr aviá adoptat l'actitud permissiva e liberala dels senhors de Lengadòc en matèria de religion. D'efièch, comptava sus la comunautat josieva per administrar Besièrs, son segond fièu per òrdre d'importància.

La Crosada dels Albigeses

En seguida de l'assassinat de son legat Pèire de Castelnòu en 1208, lo papa Innocenci III desencadena la Crosada contra los Albigeses. Fa prononciar de senténcias d'escomenge envèrs los senhors de Lengadòc (aquò concernís, entre autres, Ramon Rogièr e son oncle Ramon VI de Tolosa) jutjats tròp permissius envèrs los "erètges" e balha lor tèrra en preda.

A la mièg-1209, los crosats s'acampan a Lion e començan de caminar vèrs lo Sud. En junh, Raimon de Tolosa, vesent lo dangièr se sarrar, fa acte de contricion e promet de luchar contra l'eresia. Son escomenge es levat e sas tèrras venon alara protegidas dels crosats.

Aquestes darrièrs se viran alara vèrs Montpelhièr e las tèrras de Raimon Rogièr. Aqueste darrièr tempta de seguir los passes de son oncle mas los legats del papa refusan de lo daissar los rencontrar pendent que los crosats caminan sus Besièrs dont faguèron lo sac en julhet. Aquò butèt Raimon Rogièr a se replegar sus Carcassona.

Lo 1 d'agost, los crosats començan lo sètge de la ciutat. Coma vassal del rei d'Aragon, Ramon Rogièr pensava que Pèire II lo vendriá secórrer, mas aqueste darrièr, vassal dirècte del papa, preferiguèt la via diplomatica e joguèt lo mediator. Las negociacions capitèron pas e lo rei tornèt partir. L'aiga venguèt a mancar dins la ciutat, çò que provoquèt sa reddicion vèrs lo 15 d'agost.

Raimon Rogièr prenguèt en carga las negociacions. Çò que s'i passèt es somés a d'especulacions. Foguèt arrestat pendent los perparlars o se constituiguèt otatge en escambi de la vida dels abitants de la ciutat? Çò segur es que se retrobèt embarrat dins una de sas pròprias bassas-fòssas e los abitants de Carcassona foguèron caçats de la vila sens poder prendre de qué assegurar lor per viure.

Qualques meses mai tard, Raimon Rogièr moriguèt al fons de son croton, versemblablament d'una dissentariá, causa que s'adobèt plan per Simon de Montfòrt que poguèt prendre possession dels territòris Trencavel.

Precedit per	Ramon Rogièr Trencavel	Seguit per
Rogièr II Trencavel	vescomte de Besièrs, de Carcassona e d’Albi 1194-1209	Simon de Montfòrt