Pesadas d'Happisburgh

Un article de Wikipèdia, l'enciclopèdia liura.
Airal ont se trobèron las pesadas amb un agrandiment d'una marca de pè

Las pesadas d'Happisburgh son un ensems d'un cinquenat de marcas de pès d'ominids fossilizadas que datan de la debuta del Pleistocèn trobadas sus una plaja d'Happisburgh, un vilatge del país de Norfolk en Anglatèrra. Foguèron descobèrtas en mai de 2013 per Nicholas Ashton, conservador del British Museum, e Martin Bates de l'Universitat Trinity Saint David. Se podián observar dins un jaç de sediments revelat per l'erosion litorala consecutiva a la tempèsta qu'afectèt l'airal durant aquel periòde. Pasmens las pesadas poguèron pas èsser preservadas, e al cap de doas setmanas desapareguèron del tot per encausa de l'erosion.
Malgrat l'impossibilitat de conservar las pesadas, los cercaires ne poguèron enregistrar d'imatges en 3D per mejan de fotogrametria en trabalhar durant los periòdes de marèa bassa, sovent jos una fòrta pluèja. Los documents foguèron analisats posteriorament per Isabelle De Groote de l'Universitat John Moores de Liverpool e aquesta confirmèt que s'agissiá de pesadas d'omininis.

Los resultats de l'estudi de las traças foguèron faches publics lo 7 de febrièr de 2014, e s'indiquèt alara qu'èran mai ancianas que 800.000 ans, çò que ne fa las pesadas d'ominids conegudas mai ancianas en defòra del continent african. foguèron publicats dins la revista electronica PLOS ONE.

La descobèrta[modificar | Modificar lo còdi]

L'airal de descobèrta[modificar | Modificar lo còdi]

Localizacion geografica de la trobalha

L'airal d'Happisburgh es un espandi ont s'es fach un nombre important de trobalhas arqueologicas d'un biais constant dempuèi fòrça temps que la còsta es somesa de longa a l'erosion marina. Las atestacions mai ancianas datan de 1820 que de pescaires i trobèron dins sas sàrcias de dents, d'òsses, e mai de banas de mantun animal preistoric coma d'elefants, de cèrvis, de rinocèrosses e d'autras espécias desaparegudas.
Mai recentament en 2000, un òme que se passejava amb son gos per la plaja trobèt un bifaç de selze negre que data d'entre 600.000 e 800.000 ans.