Ofensiva de la Baltica
L'ofensiva de la Baltica se debanèt dins lo corrent de la Segonda Guèrra Mondiala dau 14 de setembre au 24 de novembre de 1944. Opausèt l'Armada Roja que gropèt mai de 1 500 000 combatents sostenguts per 17 000 canons, 3 000 carris e 2 600 avions ai fòrças de l'Axe (armada alemanda renfòrçada per de volontaris locaus) qu'alinhèt aperaquí 730 000 òmes, 7 000 pèças d'artilhariá, 1 260 carris e 400 avions. S'acabèt per una victòria sovietica importanta ambé la reconquista la màger part dei país baltics e l'enceuclament dei rèstas dau Grop d'armadas Nòrd de la Wehrmacht (500 000 òmes) dins la peninsula de Curlàndia onte demorèt blocat fins a la fin de la guèrra.
La conquista dau litorau estonian menaçava Finlàndia d'una ataca per darrier e entraïnèt lo cambiament de camp de Helsinki que chausiguèt de negociar la fin de la Guèrra de Contuniacion en cambi dau sauvament de son independéncia. Ansin, lo 19 de setembre, foguèt signat l'Armistici de Moscòu entre l'Union Sovietica e Finlàndia. L'armada finlandesa acomencèt alora una tiera d'atacas còntra lei fòrças alemandas estacionadas sus son territòri.