Octavian Bringuièr
Octavian Bringuièr (en francés Octavien Bringuier; Montpelhièr, 21 de genièr de 1829 – Montpelhièr, 10 de setembre de 1875) foguèt un escrivan e lingüista occitan del país de Montpelhièr.
Biografia[modificar | Modificar lo còdi]
Octavian Bringuièr nasquèt en 1829 dins una familha de la pichona borgesiá montpelhierenca. Faguèt d'estudis classics abans de s'engatjar dins l'armada quand faguèt sos 18 ans. Aprèp qualque temps que se vegèt viatjar per divèrses territòris de l'estat francés e mai en Argeria laissèt l'armada en 1854. Dintrèt en 1857 a la Pòsta, foguèt mandat a Arle ont coneguèt e s'amistancèt amb mantes felibres. Aquelas relacions faguèron que comencèt alara d'escriure en occitan Puèi las mutacions lo portèron a Marselha, Avinhon abans de tornar a Montpelhièr en 1864. En genièr de 1866 se maridèt amb Marta Ròsa Bonet. Partiguèt amb Carles de Tortolon tre 1873 explorar la frontièra lingüistica entre occitan e francés. Venguèt president de la Societat per l'Estudi de las Lengas Romanicas.