Neturei Karta

Un article de Wikipèdia, l'enciclopèdia liura.
Anar a : navigacion, Recercar
Beth Midrash de Neturei Karta a Jerusalèm

Neturei Karta (נטורי קרתא en judeoaramèu babilonian, valent a dire « los gardians de la ciutat ») es un grop josieu haredí (ortodòxe).

Fan partida de l'Edah Haredit, un movement que se basa sus la literatura rabinica que crei que dins l'antiquitat lo poble josieu foguèt forabandit de sa tèrra e l'estat josieu destruch per la volontat divina e solament lo Messias o podrà restablir, doncas cada temptativa umana de recrear aquel estat abans la venguda del Messias seriá un atac contra aquela volontat. Al moment de las eleccions refusan sistematicament de votar. Lo grop apareguèt en 1938, resultat d'una scission del partit religiós Agudat Yisrael, considerat pus tolerant sus l'idèa de l'estat josieu. Las tendéncias fondamentalistas contràrias a la creacion de l'estat josieu son agropadas dins l'Edah Haredit, una federacion pro flexibla de grops fondamentalistas autonòms (ont s'inclutz Satmar), qu'a sos pròpris tribunals rabinics en Israèl.

Istòria[modificar | modificar la font]

La majoritat dels Neturei Karta descendon de josieus ongreses qu'al començament del sègle XIX s'establiguèron dins la Vila Vièlha de Jerusalèm. S'opausèron a l'arribada d'immigrants josieus dempuèi Euròpa, que lor tòca èra de crear un estat sobeiran josieu en Palestina contrarotlada per l'Empèri Otoman e puèi pel Britanic.

Lor nombre es estimat entre 5000 e mens de 1000. Los membres se tròban principalament a Jerusalèm (en particular dins lo quartièr de Mea Shearim), amb de centres a Nòva York e a Beit Shemekh, pròche de Jerusalèm. D'autres grops pus pichons, associats amb Neturei Karta mas sens ne far oficialament partida, se tròban a Londres, Viena, Anvèrs, Nòva York e dins l'estat de Nòva York. I a tanben una pichona comunautat a Montreal en Canadà.