Mont Fuji

Un article de Wikipèdia, l'enciclopèdia liura.
Anar a : navigacion, Recercar
Lo mont Fuji, Japon

Lo mont Fuji (富士山), amb 3776 m d'altitud, es la montanha mai nauta de tota l'illa de Honshu e de tot Japon. Se tròba entre las prefecturas de Shizuoka e Yamanashi dins lo Japon central e just al ponent de Tòquio, d'ont se pòt observar un jorn desencrumit. Fuji es un estratovolcan.

Considerat territòri sagrat dempuèi l'antiquitat, i èra enebit per las femnas d'i pujar a la cima fins a l'èra Meiji (fin del sègle XIX). Uèi lo jorn es conegut coma una destinacion toristica, e per far d'alpinisme, mai que mai entre los meses de julhet e la fin d'agost.

Lo mont Fuji es un còn volcanic atractiu e es un tèma recurrent dins l'art japonés. Lo trabalh qu'a mai de renom es l'òbra màger 36 vistas del mont Fuji del pintor ukiyo-e Hokusai. Tanben apareis dins la literatura japonesa e es lo tèma de fòrça poèmas.

Lo mont Fuji es classificat coma volcan actiu, mas presenta pauc de riscs d'erupcion. La darrièra erupcion enregistrada data de 1707 durant l'èra Hōei del periòde Edo. Se formèt alavetz un nòu cratèr e un segond pic (nomenat Hoeizan pel nom de l'èra).

Aprèp lo sorgiment dels samurais al Japon feudal (del sègle XII al sègle XVI) comencèron a s'emplegar los caractèrs kanji actuals pel "Fuji". Fu (富) significa "riquesa", mentre que ji (士) es "samurai". E san (山) significa "montanha", lo nom complet es doncas Fujisan.