Malala Yousafzai

Un article de Wikipèdia, l'enciclopèdia liura.
Anar a : navigacion, Recercar
Malala Yousafzai, amb Barack Obama e sa familha dins lo Burèu Oval l'11 d'octobre de 2013

Malala Yousafzai (en pashto: ملاله یوسفزۍ‎; en ordo: ملالہ یوسف زئی‎; 12 de julh de 1997) es una adolescenta activista paquistanesa que lucha en favor de l'educacion e dels dreches de las femnas. Venguèt famosa tre 2009, quand aviá pas que 11–12 ans, qu'escriviá un blòg, jos un pseudonim, per la BBC e i narrava sa vida jos la lei dels talibans, los ensages que fasián per tal de contrarotlar la Val de Swat, e a l'encòp i far conéisser sas idèas per afavorir l'educacion de las dròllas. Son engatjament foguèt recompensat lo 19 de decembre de 2011 amb lo primièr Prèmi Nacional del Jovent de Paquistan, que venguèt puèi lo Prèmi Nacional Malala de la Patz, decernit pel govèrn paquistanés. Lo 9 d'octobre de 2012, Malala foguèt victima d'una temptativa d'assassinat e recebèt una bala dins lo cap e lo còl del temps qu'èra a tornar en cò sieu dins un bus escolar. Capitèt de subreviure e foguèt mandada aprèp qualques jorns en Anglatèrra, al Queen Elizabeth Hospital de Birmingham per i seguir una reeducacion.

Lo 29 d'abril de 2013, la revista america Time la placèt en cobèrta e la designèt coma una de "las 100 personas mai influentas del mond". Recebèt divèrses recompensas dins mantun país coma per exemple lo Prèmi Internacional Catalonha en mai del meteis an per "sa determinacion e son coratge dins la defensa dels dreches de l'òme".

Es estada nomenada demest los candidats al Prèmi Nobel de la Patz de 2013.