Los Fieus

Un article de Wikipèdia, l'enciclopèdia liura.

Los Fieus es un site preïstoric situat a Mièrs, dins la partida septentrionala del Causse de Gramat, al nòrd de Carcin, dins lo departament d'Òlt.

Se compausa d'una cauna ornada perlongada per una galariá karstica afondrada dins sa partida centrala («locus 1») e d'un jaç de plen aire («locus 2»). I aguèt una ocupacion umana tre lo Paleolitic Mejan entrò a l'Edat Mejana.

Se pòt visitar dempuèi junh de 2007, après lo desvolopament d'un important projècte per sa proteccion e sa presentacion al public.

La cauna dels Fieus foguèt descobèrta lo 2 de novembre de 1964 pel proprietari dels luòcs d'alavetz, E. Caminada, e una còla del Club d'Espeleologia de Brageirac compausada de J. Bouchereau, F. Feltrin, J. Guilhèm, N., T. e Jean Lesur, L. e C. Perrièr. Lo grop cercava un accès vèrs lo riu sosterranh de Padirac e entreprenguèt d'òbras de desgatjament a l'intrada de la cauna que èra, alavetz, un budèl estrech localizat entre lo som de l'emplenatge arqueologic del «locus 1» e la vòlta de la cauna. Los inventors se trachèron rapidament de la preséncia de figuracions parietalas, que de mans negativas. La cauna venguèt «monument istoric» lo 17 de genièr de 1967; la parcèla contenent lo jaç preïstoric es inscricha sus l'inventari suplementari dempuèi lo 9 de febrièr de 1993. Uèi, i a un grand nombre de descripcions e d'estudis sus la cauna. Compta una sala unica d'una trentena de mètres de longor e d'una quinzena de mètres de largor que s'i accedís per un corredor bas d'una vintena de mètres. La tièra de las figuracions compta 13 mans negativas complètas, que 11 rojas e 2 negras, de nombrosas pontuacions digitalas e de bastonets roges en mai de gravaduras e de jalonaments sus un blòc isolat cobèrt de formacions estalagmiticas al centre de la sala (1 boquetin, 2 mamots, 1 linha dorsala de caval, 1 tectifòrme...). L'essencial de las figuracions foguèt restacat a la fasa anciana de l'art paleolitic carcinòl, benlèu amb una primièra fasa aurinhaciana (gravadura per jalonament) e una fasa gravetiana (mans negativas associadas a de pontuacions coma a Puèg Mèrle, a las Meravilhas, a Rocador o a Fraissinet lo Gelat). Los mamots, gravats per incisions finas en tot coïncidir amb de traches jalonats e de mans negativas, podrián èsser pus recents.