Joan VIII (papa)

Un article de Wikipèdia, l'enciclopèdia liura.
Retrach dau papa Joan VIII (1842).

Joan VIII (vèrs 820, Roma - 16 de decembre de 882) foguèt lo 107en papa de la Glèisa Catolica Romana dau 13 de decembre de 872 au 16 de decembre de 882. Succediguèt a Adrian II (867-872) e foguèt remplaçat per Marin Ièr (882-884).

Avans son eleccion, èra arquediague de Roma mai l'escrutinh foguèt l'objècte d'una oposicion viva de part dau futur papa Formòsi. Pasmens, capitèt de dominar la faccion de son adversari. Papa energic coma son predecessor Nicolau Ièr (858-867), acceptèt divèrsei demandas dau patriarca Foci de Constantinòble per defugir un esquisme novèu e sostenguèt leis esfòrç d'evangelizacion dau missionari Metòde.

A la mòrt de l'emperaire Loís II, assaièt d'afirmar la primautat de la papautat sus l'Empèri. D'efèct, refusèt de coronar l'eiretier designat per Loís II au profiech de Carles lo Calvet coronat en Roma en 875. Pasmens, aquò entraïnèt una guèrra novèla entre lei carolingians e Roma foguèt menaçada per leis adversaris de Carles. Puei, lo projècte de Joan VIII s'acabèt per una revirada ambé la mòrt de Carles lo Calvet dins leis Aups en 877. Menaçat per seis adversaris, lo papa foguèt obligat de s'enfugir de Roma en 878.

En 881, Joan VIII assaièt tornarmai de coronar un emperaire favorable a seis interès ambé Carles III lo Gròs. Pasmens, aquela temptativa s'acabèt tanben per una revirada ambé l'abdicacion de Carles en 888. Enterin, Joan VIII èra estat assassinat lo 16 de decembre de 882. Lei rasons de sa mòrt son desconegudas (sostèn a certanei faccions carolingianas, acòrds favorables ai bizantins, còst tròp important de sa politica... etc.).

Liames intèrnes[modificar | Modificar lo còdi]

Bibliografia[modificar | Modificar lo còdi]

Nòtas e referéncias[modificar | Modificar lo còdi]