Isin

Un article de Wikipèdia, l'enciclopèdia liura.
Anar a : navigacion, Recercar
Mapa de la Mesopotamia antica

Isin es una vila de Mesopotamia antica. Foguèt tanben la capitala de dos reiaumes de l'Antiquitat.

Lo premier reiaume d'Isin[modificar | modificar la font]

Aiça vèrs -2017, pendent l'afondrament dau reiaume de la tresena dinastia d'Ur, Ishbi-Erra, governador d'Isin, proclamèt son independéncia. Pervenguèt tanben a rebutar l'armada elamita que destruguèt Ur en -2004. Puei, s'emparèt d'Ur e poguèt se revendicar de la prestigiosa tresena dinastia d'Ur. Son successor Shu-ilishu faguèt la patz amb l'Elam e recuperèt l'estatua sacrada dau dieu Nanna d'Ur, pressa pendent lo pilhatge de la vila en -2004[1]. Lo poder de la dinastia aumentèt fins a la mòrt d'Ishme-Dagan.

D'efèct, Isin aguèt de luchar còntra la vila vesina de Larsa. En -1925, Gungunum de Larsa prenguèt Ur. Puei, Larsa comencèt en -1898 de trabalhs idraulics força importants per desviar l'aiga de canaus alimentant Isin. Acabadas en -1877, aqueleis òbras li donèron un avantatge decisiu[1]. En -1870, Isin perdèt la vila santa de Nippur. Maugrat una reconquista quatre ans pus tard, es una desfacha simbolica grèva. Isin acumulèt adonc lei revèrs : pèrda d'Ibrat en -1844, desfacha d'una coalicion unissent Uruk, Kazallu, Isin e l’Elam còntra Larsa en -1837, segonda pèrda de Nippur en -1828 e novèla revirada d'una coalicion amb Uruk, Babilònia, Sutum e Rapiqum[1].

En -1802, Larsa lancèt son ofensiva finala. Prenguèt Uruk (-1802), Al-Damiq (-1799), Dunnum (-1795) e assetgèt Isin. Maugrat una intervencion de Babilònia, la vila tombèt en -1794 o -1793[1].

Annexions ai reiaumes de Larsa puei de Babilònia e abandon de la vila[modificar | modificar la font]

Après la conquista de -1794/93, Isin foguèt annexada au reiaume de Larsa. Pasmens, aqueu reiaume foguèt destruch a son torn per Babilònia en -1763. Isin foguèt adonc annexada per lo rèi Hammurabi. Puei, après la revòuta de Larsa de -1741 a -1736, Isin foguèt abandonada coma abòrd de vilas dau sud de Mesopotàmia[1].

La segonda dinastia d'Isin[modificar | modificar la font]

La vila foguèt rebastida e unei construccions importantas apareguèron pendent lei rèines de Kassits Kadashman-Enlil e Kurigalzu II. En -1155, après la tombada de la dinastia kassita de Babilònia, Isin venguèt lo centre de la resisténcia còntra l'Elam amb la fondacion d'una dinastia poderosa. Aquela dinastia prenguèt Babilònia e i transferiguèt la capitala. Mai en -1027, la dinastia dispareguèt e la region conoguèt de trébols[1].

Fin de la vila[modificar | modificar la font]

Isin foguèt un centre provinciau pendent lei reiaumes de Babilònia seguents o leis empèris assirian e aquemenida avans d'èsser abandonada.

Lista dei rèis d'Isin[modificar | modificar la font]

Premiera dinastia[2].[modificar | modificar la font]

Segonda dinastia[3].[modificar | modificar la font]

Nòtas e referéncias[modificar | modificar la font]

  1. 1,0 1,1 1,2 1,3 1,4 1,5 Luc Bachelot, Francis Joannès, Cécile Michel, Dictionnaire de la civilisation mésopotamienne, Laffont (2001).
  2. Dictionnaire de la civilisation mésopotamienne, Sous la direction de Francis Joannès, Editions Robert Laffont (2001), p. 419.
  3. Dictionnaire de la civilisation mésopotamienne, Sous la direction de Francis Joannès, Editions Robert Laffont (2001), p. 118