Groove High

Un article de Wikipèdia, l'enciclopèdia liura.

Groove High es una seria televisada francoaustraliana de 26 episòdis creada per Frédéric Puech e Virgile Troullot, producha per Disney Channel Original e difusada per lo premier còp entre 2012 e 2013. Conta leis aventuras d'un grop de jovents inscrichs dins una escòla d'arts de l'espectacle fòrça originala dicha Groove High. Chasque episòdi comença per un passatge de presa de vista reala dei personatges Tòm e Zoè utilizada per introdurre una remembrança que sèrve d'encastre au racònte. Aquela remembrança es sovent deformada per lei dos personatges segon lors desarcòrds. D'autrei presas de vista realas son utilizadas coma jalons dins lo corrent de l'episòdi. Entre aquelei presas, la màger part de l'episòdi adopta un format animat.

Personatges[modificar | Modificar lo còdi]

  • Zoè Myer (Samantha Barks) es una cantaitritz excepcionala mai a paur de cantar en public. Es la melhora colega de Tòm e es possible que ne'n sigue amorosa. Es tanben la proprietària d'un camaleon dich Scoot.
  • Tòmas Mason dich Tòm (Jonathan Bailey) es un personatge divertissent, popular e fòrça talentós. En quista permanenta de glòria, de fortuna e de còps de hamburgers, es amorós de Zoè. Pasmens, avoar sei sentiments li sembla impossible car Zoè es tanben sa melhora colega.
  • Victòria Benson dicha Vic es una dançairitz talentosa, graciosa, totjorn a la mòda mai de còps un pauc estupida. Es venguda una colega de Zoè e lei doas filhas partejan la mema chambra dins l'escòla. Voudriá integrar l'escòla rivala A-List.
  • Basile Trobatori dich Baz es un actor pauc finòt que vòu venir una celebritat mondiala. Parteja sa chambra ambé Tòm e es tanben venguda colega ambé Zoè. Dins lo corrent de la seria, comença de sortir ambé Lena.
  • Lena Michèla Fayot es una acrobata que conoisse fòrça ben leis arts dau circ. Fa partida deis estudiantas pus talentosas de Groove High e son intelligéncia es sovent un atots important per sei camaradas. Dins lo corrent de la seria, comença de sortir ambé Baz.
  • Lex Turtletaub es lo fraire cadet de Sasha e lo geek de l'escòla. Es capable de bricolar divèrsei sistèmas (videosusvelhança, micròphòne) ò instruments. Pasmens, seis invencions an sovent de defauts indesirables. Es lo nòvi de Cocò tre lo començament de la seria.
  • Sasha Turtletaub es la sòrre ainada de Lex e una cantaitritz talentosa de còps gelosa de Zoè. Es subretot la susvelhanta « adjoncha » de Groove High e s'ocupa activament de donar d'avertiments a sei camaradas.
  • Duke Kincaid es un estudant de l'A-List, escòla rivada de Groove High, amorós de Zoè. Richissime e totalament desleiau, es sovent lo personatge malefic dau racònte lèst a totei lei complòts per eliminar son rivau Tòm ò per servir seis interès.
  • Cocò Clarington es l'assistenta personala de Duke que li sèrve de domestica per entretenir son ostau, netatjar sei besonhas e complir divèrsei missions. Pasmens, son langatge es sovent liure e pòu de còps criticar Duke ò ajudar Zoè e Tòm per desjogar lei complòts de son cap. Es la nòvia de Lex tre lo començament de la seria.