German Encòntra

Un article de Wikipèdia, l'enciclopèdia liura.

Pèire German Encòntra (en francés Germain Encontre; Marsilhargues, 9 de junh de 1809 - Constantina, Argeria, 8 de julhet de 1853) foguèt un escrivan occitan e personatge politic contestatari de Lengadòc.

Biografia[modificar | Modificar lo còdi]

Representacion d'un gardian dins Una corsa de buòus

German Encòntra nasquèt en 1809 dins una familha de proprietaris amonedats de Marsilhargues. Èra lo filh de Pau Encòntra e de Flora Felinas e aviá dins sos avantpassats de pastors protestants.

Coma lo protestantisme èra ben ancorat dins la familha recebèt una educacion protestanta. Faguèt sos estudis segondaris e a la fin d'aquestes obtenguèt son bachilierat.

Malgrat lo diplòma son emplec foguèt de comés librari a Montpelhièr durant dètz ans. En 1839 publiquèt Una corsa de buòus amb una introduccion que presenta sos ensages ortografics a partir de la grafia emplegada per l'abat de Sauvatges.

Se maridèt lo 31 d'agost de 1844 amb Adelina Danièl e aguèron tres enfants. Aquela annada la mòrt de son paire li permetèt d'eiretar d'un eiretatge consequent e aital poguèt dobrir una librariá a Nimes lo 30 d'octobre de 1845. Pasmens son gost pel comèrci sembla d'èsser estat mai limitat que son interès per la lectura. Aital sos afars fasián pas pro de beneficis e li calguèt vendre las tèrras de Marsilhargues dapasset per ensajar de salvar la librariá.

Illustracion d'una corsa dins Una corsa de buòus

Comencèt alara son engatjament politic e se botèt a escriure exclusivament en francés. S'avodèt a compausar divèrsas satiras socialas coma Les Héros de la Finance en 1847. L'an seguent, en 1848 comencèt a far de politica, frequentèt los clubs republicans e participèt fòrça activament a las campanhas de banquets. Se presentèt puèi a las eleccions mas i fracassèt bèlament. La capitada electorala de Louis-Napoléon Bonaparte foguèt viscuda per Encòntra coma una traïson dels ideals republicans, çò que generèt una tièra d'òbras contestatàrias en francés coma Les gens comme il faut, à l'esplanade de Nîmes en 1848, Pauvre soldat, Confession de foi du citoyen Encontre e Le Peuple Souverain en 1849.

Foguèt atirat alara pels extrèms e s'afilièt a l'esquèrra socialista e obrièra. Aquela afiliacion provoquèt son empresonament per primièr còp en abril de 1849. Foguèt jutjat lo 19 de junh de 1849 e liberat puèi. German Encòntra foguèt membre del comitat de resisténcia que se formèt a Nimes l'endeman del còp d'estat del 2 de decembre de 1851. Lo comitat se vegèt rapidament destrantalhat e Encòntra foguèt arrestat lo 10 de decembre de 1851. Son procès se tenguèt lo 12 de març de 1852: foguèt condemnat a la deportacion en Argeria qu'i moriguèt l'an seguent, lo 8 de julhet de 1853 a l'espital militar de Constantina.

Òbras[modificar | Modificar lo còdi]

En occitan[modificar | Modificar lo còdi]

  • Una corsa de buòus (1839)

En francés[modificar | Modificar lo còdi]

  • L'inondation de 1840 (1841)
  • Les héros de la Finance (1847)
  • Les gens comme il faut à l'Esplanade de Nîmes (1848)

Ligams extèrnes[modificar | Modificar lo còdi]