Fluorita

Un article de Wikipèdia, l'enciclopèdia liura.
Anar a : navigacion, Recercar
Fluorita

La fluorita es un mineral format per la combinason de calci e fluor, fluorur de calci, de formula CaF2. Cristalliza dins lo sistèma cubic (regular). Se descriu coma un empaquetatge cubic compacte d'atòms de Ca, que los atòms de F i ocupan totes los cròs tetraedrics. D'après la relacion de ràdios ionics, aquesta descripcion sembla absurda (1,33 Å per F- e 0,99 per Ca2+) – los ions F-- jamai cauprián dins los cròs de Ca. Ça que la, aquesta descripcion reprodutz fidèlament las posicions relativas dels atòms dins la cela unitat. Segon aquesta descripcion, totes lo cròs octaedrics de l'estructura serián vacants. La coordinacion del F es tetraedrica (IC = 4), encara que la del Ca es un cube (IC = 8).

  • Formula: CaF2
  • Classa: alogenurs o alurs
  • Sistèma: cubic
  • Duretat dins l'escala de Mohs: 4
  • Fractura: geometrica
  • Exfoliacion: perfècta
  • Ludentor: cristallina
  • Linha: blanca

La fluorita es un mineral fòrça espandit dins la natura. Se presenta en formant de borsadas en forma de geodas o drusas e en ocupant de fendas e de cròs. Dins l'estat pur a pas de color e es transparenta, encara que dins la majoritat dels cas presenta de colors variadas pr'amor d'impuretats organicas o mineralas, generalament lo violet, mas la fluorita pòt tanben èsser blava, verda, ròsa, iranjada, auriòu o de tons mens definits. Fòrça varietats mòstran de fluorescéncia. Se presenta generalament en forma de cristals cubics fòrça ben formats, sovent amb de maclas de compenetracion de cubes. Las autras formas son raras, encara que se pòdon obténer d'octaèdres per exfoliacion. Atanben massís, compacte o granilhós. Aqueste mineral se trapa generalament dins de vetas puras o associat amb de minerals de plomb, argent o zinc. Es comun dins los calcaris e las dolomitas e, de còps, es un mineral accessòri dins de pegmatitas e dins d'autras ròcas ignèas. La fluorita se trapa generalament en Russia, Anglatèrra, China, Estats Units, Mexic, Namibia, Alemanha e Espanha (los principaus jaciments se trapavan a Caravia e Ribeseya en Astúrias, e a O Fornigal (Sallén de Galligo) en Aragon. D'importància menora coma jaciments o coma ganga de minerals metallics se trapa de fluorita a Pola de Siero, Villabona e Tucs d'Euròpa (Astúrias e Cantàbria) e a Irun e a Berastegi (Guipuscoa). En Catalonha los jaciments d'interès son los d'Anglés, Montseny, Sant Cugat del Vallès, ont apareis dins d'octaèdres verds fòrça luminescents, e Ulldemolins).

Emplecs de la fluorita[modificar | modificar la font]

Las varietats cristallinas, coma l'espat de Derbyshare qu'a una color leugièra, se talhan subre vas e subre d'autres ornaments; la varietat clorofan s'utiliza coma gema. L'emplec principal de la fluorita es estat la produccion d'acid fluoridric, material essencial dins la fabricacion de criolita sintetica e de fluorur d'alumini per l'indústria de l'alumini, e dins fòrça autras aplicacions de l'indústria quimica. La fluorita es comuna dins la fondariá d'acièr. S'utiliza en grandas quantitats dins la produccion d'esmalt e de veire traslusent; los cristals perfèctes s'utilizan dins la fabricacion de lentilhas apocromaticas. Al delà de son utilizacion ornamentala, la fluorita s'utiliza dins las acierias coma element qu'ajuda a la fusion del fèrre. Es tanben utilizada dins la fabricacion de fibras de veire e de veire opalin mas, subretot, per la produccion d'acid fluoridric e d'autres produchs fluorats, coma lo fluorur d'alumini del qual s'obten l'alumini metallic. S'utiliza tanben dins l'indústria del ciment per incorporar d'autres materiaus al clinker e dins la fabricacion d'abrasius e d'articles de soudadura.