Eròdes Antipas

Un article de Wikipèdia, l'enciclopèdia liura.
Anar a : navigacion, Recercar
Pagina d'ajuda sus l'omonimia Pels articles omonims, vejatz Eròdes (omonimia).

Eròdes Antipas (tanben conegut coma Eròdes Antipater) (Judèa, 20 aC - Sent Bertran de Comenge, 39), foguèt tetrarca de Galilèa e de Perèa (4 aC - 39). Èra lo filh d'Eròdes lo Grand e de la samaritana Malthace e lo fraire d'Arquelau. Foguèt educat a Roma amb Arquelau e son frairastre Eròdes Felip.

A la mòrt de son paire, August li autregèt la tetrarquia de Galilèa e de Perèa. Contractèt un maridatge escandalós amb Erodias, molher de son frairastre Eròdes Felip. Per se poder maridar, repudièt son esposa legitima, filha d'Aretas IV, rei dels nabatèus (reialme arabi que sa capitala èra Petra). Enforiscat, Aretas ataquèt Eròdes. Sembla que l'intervencion del governador roman de Siria, Vitèlli, evitèt sa derrota complèta.

Eròdes Antipas continuèt l'afanh o obsession de son paire pels bastiments grands. Fortifiquèt Seforis, sa primièra capitala e faguèt bastir la fortalesa de Betaram en Perèa e la ciutat de Tiberiàs (que bategèt en l'onor de l'emperaire Tibèri), a la broa del Lac de Tiberiàs o de Genesarèt, que venguèt sa segonda capitala.

En 39, benlèu a l'instigacion d'Erodias, demandèt a Caligula, tornar nomenat emperaire, la corona de Judèa, que son titular èra son nebot Agripa I. En responsa Agripa escriguèt a l'emperaire Caligula en acusant Eròdes d'aver concertat una aliança secrèta amb los parts contra Roma. Caligula deportèt alavetz Eròdes Antipas e sa femna a Lugdunum Convenarum (Sent Bertran de Comenge), ont moriguèt aquel an.

Eròdes Antipas apareis dins lo Novèl Testament coma lo responsable de l'execucion de Joan Batista, a l'instigacion de sa molher Erodias (Marc 6:17-29, Matieu 14:3-12). Segon l'Evangèli de Luc, Jèsus se presenta davant el e patís sas trufandisas (Luc 23:6-12).