Cauna de las Combarèlas
La cauna ornada de las Combarèlas se tròba a las Aisiás de Taiac, en Sarladés, dins la region istorica de Peiregòrd e lo departament de Dordonha.
Amb pus de 600 figuracions parietalas, majoritàriament gravaduras, aquesta cauna, descobèrta en 1901, es en tota justícia considerada coma un santuari màger de la cultura magdaleniana (aperaquí 13 000 ans abans lo present). Mai enlà del pòrge excavat per Émile Rivière dempuèi 1892, s'afonzan doas galariás divergentas. La pus importanta, dobèrta a la visita, es un corredor estrech de pus de 240 m de longor. Las bèstias, finament gravadas e pas sovent dessenhadas en negre, evocan una varietat de fauna, inclusent cavals, rangièrs, boquetins, mamots, rinocèros, orses, felins en mai de qualques bovids; la lectura d'aquelas gravaduras d'animals, largament encabestradas, es facilitada per un tractament sovent realista que las distinguís clarament d'un ensems excepcional d'ua cinquantena de figuras antropomòrfas, fòrça pus esquematicas, e de qualques signes, sensiblament los tectifòrmes.
Fa partida del Patrimòni Mondial de l'Umanitat de l'UNESCO dempuèi 1979, en associacion amb d'autres sites e caunas pintadas de Peirigòrd jol nom de «Sites preïstorics e caunas ondradas de la val de Vesera».
La cauna es dobèrta al public mas lo nombre de visitaires es limitat a grops de 6 personas.
