Campanha de Crimèa
La campanha de Crimèa se debanèt dins lo corrent de la Segonda Guèrra Mondiala entre lo 24 de setembre de 1941 e lo 4 de julhet de 1942. Opausèt leis armadas alemanda e romanesa ai fòrças sovieticas cargadas de protegir la peninsula e la basa navala de Sebastòple. Son debanament pòu se devesir entre tres fasas principalas :
- de setembre a decembre de 1941, leis Alemands e lei Romanés capitèron d'ocupar la màger part de Crimèa dins l'encastre dau Plan Barbarossa e dei dificultats de l'URSS per arrestar l'invasion de son territòri.
- de la fin de decembre de 1941 au començament de genier de 1942, una còntra-ofensiva ivernenca de l'Armada Roja sostenguda per plusors desbarcaments de renfòrç permetèt de reconquistar la peninsula de Kertch e de desgatjar Sebastòple. Pasmens, a la prima, lei fòrças de l'Axe capitèron d'arrestar son reculament.
- de mai a junh de 1942, d'ofensivas novèlas deis Alemands e dei Romanés obliguèron lei Sovietics de se retirar a cha pauc sus Sebastòple. Après de bombardaments importants e l'evacuacion d'una partida importanta dei defensors, la vila tombèt finalament lo 4 de julhet (sètge de Sebastòple).
Durant tota la campanha, leis Alemands e seis aliats perdiguèron 30 000 òmes (tuats e bleçats) e lei Sovietics aperaquí 250 000 soudats (tuats, bleçats e presoniers) e 260 carris.