Batalha de Debrecen
La batalha de Debrecen se debanèt en Ongria entre lo 6 e lo 29 d'octòbre de 1944 dins lo corrent de la Segonda Guèrra Mondiala. Opausèt lei fòrças alemandas e ongresas ai tropas sovieticas e romanesas dins la region de Debrecen e s'acabèt per un resultat indecís. D'efèct, la batalha acomencèt amb una ofensiva sovietica destinada a rompre lei linhas de l'Axe per atacar dirèctament Budapèst e eliminar Ongria dau conflicte. Pasmens, en despiech d'una avançada de plusors desenaus de quilomètres (160 km dins certanei sectors) e la conquista de Debrecen (19-20 d'octòbre), lei Sovietics e lei Romanés foguèron arrestats per una tiera de còntra-ofensivas e una resisténcia acarnada. La temptativa d'ocupar Budapèst rapidament mau capitèt totalament. De mai, leis asalhidors subiguèron de pèrdas importantas ambé 118 000 òmes neutralizats e aperaquí 500 carris e mai de 1 600 canons perduts. En fàcia, lei pèrdas de l'Axe foguèron pus feblas ambé solament 53 000 soudats perduts e 200 carris e 490 canons destruchs.