Batalha de Courbevoie

Un article de Wikipèdia, l'enciclopèdia liura.
Anar a : navigacion, Recercar

La batalha de Courbevoie se debanèt lo 2 d'abriu de 1871 entre l'armada de Versalhas e la Gàrdia Nacionala de París servent la Comuna. Foguèt la premiera batalha importanta de la guèrra civila francesa de 1871 e una victòria menora per lo govèrn de Versalhas. Aguèt tanben luòc lei premiers presoniers de la Comuna fusilhats per l'armada governamentala.

Lei fòrças en preséncia[modificar | modificar la font]

Lei fòrças dins lo vilatge de Courbevoie foguèron limitadas entre 500 e 600 combatents[1] a l'entorn d'una barricada[2] blocant la carriera principala de Courbevoie. Quauqueis arquieras èran estadas fachas dins lei bastiments vesins[2].

L'armada versalhesa engatgèt de fòrças pus importantas ambé quasi 8000 soudats e 600 a 700 cavaliers[2]. Ansin, leis unitats utilizadas dins l'ataca foguèron [2]:

  • Bregada dau generau Bruat :
    • 74en regiment de marcha.
    • 1er regiment de marcha d'infantariá de marina.
    • 2en regiment de marcha d'infantariá de fusilhiers marins.
  • Bregada dau generau Daudel :
    • 113en regiment de linha.
    • 114en regiment de linha.
  • Destacaments de la bregada de cavalariá dau generau Vinoy.

La batalha[modificar | modificar la font]

L'objectiu de l'armada versalhesa èra la presa dau giratòri de Courbevoie ocupat per lei Comunards[2]. Lo plan èra que lei bregadas Bruat e Vinoy atacarián d'a frònt la posicion federa pendent que la bregada Daudel virariá lo vilatge[2].

L'ataca comencèt vèrs 12 h ambé lo 74en regiment après un bombardament per lei canons de la bregada Vinoy[2]. La defensa federada vigorosa e lo manca d'experiéncia dei soudats entraïnèron un movement de panica[2]. Lo regiment s'enfugiguèt en desòrdre e solament arrestats per lei menaças de Vinoy en persona e de seis oficiers. L'ataca poguèt reprendre malaisadament. Finalament, l'arribada dau 114en regiment sus la drecha dei Federats e la presa de Puteaux per l'infantariá de marina obliguèt la retirada dei defensors vèrs Neuilly[2] [3].

Lei pèrdas foguèron de 12 tuats e 30 presoniers per la Comuna e 5 tuats e 21 bleçats per l'armada governamentala[3].

Seguidas de la batalha[modificar | modificar la font]

De sera, l'armada versalhesa abandonèt Courbevoie e tornèt a l'entorn de Versalhas. Pasmens, Vinoy ordenèt de fusilhar 5 presoniers[4]. 2 per que èran de desertors e 3 per que foguèron capturats amb una arma. Foguèron lei premiers fusilhats de la Comuna.

A París, l'ataca causèt una colèra violenta e la Comission executiva acceptèt un projècte de sortida contra Versalhas per lo 3 d'abriu.

Nòtas e referéncias[modificar | modificar la font]

  1. Prosper Olivier-Lissagary (Histoire de la Commune de 1871, La Découverte/Poche (1990), p. 182) parlèt de 500 a 600 Federats. Lo generau Vinoy (Richards Tombs, La guerre contre Paris 1871, Flammarion (2009), p. 122) leis estimèt a 500.
  2. 2,0 2,1 2,2 2,3 2,4 2,5 2,6 2,7 2,8 Richards Tombs, La guerre contre Paris 1871, Flammarion (2009), p. 122
  3. 3,0 3,1 Prosper Olivier-Lissagaray, Histoire de la Commune de 1871, La Découverte/Poches (1990), p. 182.
  4. Prosper Olivier-Lissagaray, Histoire de la Commune de 1871, La Découverte/Poches (1990), p. 183.