Un article de Wikipèdia, l'enciclopèdia liura.
Estatua a Madrid del rei visigòt Ataülf
Ataülf (mòrt a Barcelona en 415) foguèt rei dels visigòts de Tolosa. Son nom ven del germanic atha wolf (lop nòble). Èra fraire de la femna del cap visigòt Alaric I. Son primièr prètzfach conegut foguèt lo comandament d'un còrs de renfortiment de gòts e d'uns per ajudar Alaric I après lo primièr sètge de Roma (409). Pendent lo segond sètge, l'annada seguenta, l'emperaire Prisc Atal o nomenèt Comes Domesticus. Succediguèt a son cunhat, lo primièr cap visigòt, Alaric I, e pogèt sul tròn a la fin de 410 o al començament de 411, mentre que los visigòts èran en Calàbria. L'ensag de passar al nòrd d'Africa fracassèt, doncas que dirigiguèt los visigòts vèrs lo nòrd d'Itàlia e, après passar los Alps en 412, ocupèt Provença e Aquitània, que i prenguèt Narbona, Tolosa e Bordèu (413). En 414 s'establiguèt a Narbona, ont se maridèt amb Galla Placídia, filha de l'emperaire Teodòsi lo Grand e sòrre d'Onori, alavetz emperaire roman d'Orient, que los visigòts l'avián sequestrada pendent lo sètge de Roma de 410, e que foguèt obligada de los seguir pendent totas las expedicions. A partir d'aquel moment, Ataülf ensagèt d'obtenir l'amistat dels romans, mas la responsa romana foguèt lo blocatge dels pòrts de la Narbonesa dirigit dempuèi Arle pel general Constanci. Embarrat, Ataülf traversèt los Pirenèus en 415 e prenguèt Barcelona coma basa novèla. Dins aquela ciutat nasquèt lo filh qu'aguèt de Galla Placídia, apelat Teodòsi en memòria de son grand, coma testimoniatge de l'interès per ligar amb la tradicion romana; mas l'enfant moriguèt après uns paucs meses. En agost de 415, Ataülf foguèt assassinat pels meteis gòts, probablament pel partit antiroman, opausat a la politica d'aprochament a Roma qu'Ataülf aviá practicat pendent las darrièras annadas. Li succediguèt Sigeric.
