Aqüariofilia

Un article de Wikipèdia, l'enciclopèdia liura.
Anar a : navigacion, Recercar

L'aqüariofilia es una passion que consistís a far viure de peisses dins un aqüari en reconstituent lo mai fidèlament possible lor mitan de vida (biotòp). Existisson divèrses biotòps. Cada biotòp se caracteriza per sa qualitat d'aiga (pH, KH, GH, densitat en aiga de mar...), sas espècias de peisses e de plantas. Conven doncas de pas mesclar d'espècias eissidas de biotòps de las caracteristicas aluenhadas.

Cossí començar l'aqüariofilia?

Quin volum ?[modificar | modificar la font]

Se conselha de començar amb un 100 litres minimum. Mai lo bac es pichon, mai es de mal entretenir : mai d'algas, mai de malautiás, una igièna mens bona... Fin finala : pas de pichon bac ! E sustot, pas de bocal per peisses roges. Los peisses son condemnats a tornejar durant tota lor vida, dins un volum tot pichon !

Causida del material[modificar | modificar la font]

Prendre un o dos neons segon lo volum. Un calfatge es obligatòri per la màger part de las espècias d'aiga doça, e tanben, evidentament, un filtre. Utilizatz de ceramicas per lotjar los bactèris que degradaràn la pollucion organica, una mossa e un filtratge sus carbon actiu que cal cambiar regularament, senon las toxinas qu’aurà absorbit seràn totas regetadas dins l’aiga de l'aqüari. De preferéncia causir un filtre inclús e non pas un filtre de ventosas. Los bulladors pòdon far un polit efècte, avisatz-vos çaquelà que pòdon far montar lo pH. Remplaçatz-los puslèu per un difusaire de gas carbonic, que fa créisser las plantas e demenir las algas. Prenètz tanben un salabre, de tèsts NO2 (nitrits) e pH, de bactèris e un produch per condicionar l'aiga del robinet. Pus tard deuretz crompar qualques produches antiparasits dins un bon magazin perque las malautiás tardaràn pas d'arribar...

Las decoracions[modificar | modificar la font]

Los objèctes de decoracion son pas obligatòris ; podètz prendre un objècte en plastic dins una animalariá (exemple : un pichon ponton en plastic o en resina, una pèira...). Obligatòria se prenètz un peis netejaire, una rasic. N’i a de magnificas en magazin, totas torçudas. Aquò balha vida al bac. Los netejaires n’an besonh per viure. Es segur çò que fa lo mai polit coma objècte de decoracion !

Lo sòl[modificar | modificar la font]

Cal de substrat especial per las plantas, e de sabla. Causissètz plan vòstra sabla, es ela que balha l'ambient a vòstre aqüari. Una sabla de Lèger a de tons cauds, aquò balha un ambient iranjat. Una sabla blanca brilhanta balha un ambient mai fred, l'aiga pareis pus transparenta, e de peisses de las colors vivas s'assortiràn plan dessús.

L'installacion[modificar | modificar la font]

Versatz vòstre substrat dins lo bac. Metètz un pauc d'aiga dessús per que siá pas pus en podra, mas un pauc coma una pasta. Egalizatz-la pertot. Fasètz parièr amb la sabla. Plantatz las plantas. Doblidetz pas las règlas : las grandas darrièr, las mejanas al mièg, e las pichonas davant ! Plaçatz los decòrs. S'avètz de mossa de Java, ligatz-la a la rasic amb de fial de nilon. Metètz una sieta al fons de l'aqüari. Versatz l'aiga dessús, e emplissètz lo bac. Esperatz tres setmanas abans de metre los peisses, e metètz regularament de bacterias e de fertilizant liquid per plantas. Fasètz de tèsts de nitrits e pH totas las setmanas per seguir l’evolucion... Quand metètz vòstres peisses los nitrits devon èsser a 0.

Las plantas[modificar | modificar la font]

Son indispensablas ! E magnificas ! Compratz-ne puslèu de creissença rapida per començar, evitaràn d'aver d’algas. Lor cal de fertilizant liquid (prevesètz un grand flacon, s’usa lèu...) e en opcion, pas obligatòri mas extrèmament util, un distributor de CO2. Podètz tanben lo fabricar. Doblidetz pas de daissar un grand espaci liure per la nada dels peisses. La florison es sovent possibla, e se vos agradan las plantas, perqué vos lançar pas dins la fabricacion d'un aqüari olandés, ont las plantas comptan mai que los peisses?

Los peisses[modificar | modificar la font]

Començatz amb de vivipars. Los vivipars fan pas d'uòus : lors pichons se desvolopan dins lo ventre de la maire, doncas riscan pas tant de se far manjar... Los peisses perfièches per començar ! Los guppys son de segur los mai risolièrs : los mascles ensajan de contunh de s'acoblar.

Doblidetz pas...[modificar | modificar la font]

Placetz pas l'aqüari prèp d'una fenèstra, ni prèp d'una font de bruch (tele, ràdio) ni prèp d'un radiator. Esclairatz dètz a dotze oras per jorn.