Anthony Cerniello
Anthony Cerniello (1975) es un realizador de films american. Se faguèt conéisser internacionalament gràcias a una vidèo de morfatge sonada Danielle que simula lo velhiment d'una enfant que passa d'una edat plan jove a la d'una persona vièlha en cinc minutas. Per realizar aquel document, Cerniello utilizèt la cara de son amiga Danielle e empleguèt a l'encòp de fotografias de parents pro semblants per imaginar e realizar l'evolucion probabla de la dròlla. La vidèo, que foguèt mesa sus Youtube lo 10 de setembre de 2013 coneguèt un succès enòrme e passèt lo nombre d'1 milion de visionatges en mens de cinc jorns. En 1998, l'artista, que trabalha actualament subretot dins lo mond de la publicitat, aviá ja realizat un film Jaunt V2 mas aqueste aviá pas gaire capitat.