Alain Krivine

Un article de Wikipèdia, l'enciclopèdia liura.

Alain Krivine (París, 10 de julh de 1941 es un politician francés d'extrèma esquèrra. Fondèt en abril de 1966 la Joventut Comunista Revolucionària e participèt puèi, en 1969, a la creacion de la Liga Comunista. Se presentèt mantun còp a las eleccions presidencialas francesas. Foguèt deputat europèu de 1999 a 2004.

Biografia[modificar | Modificar lo còdi]

Alain Krivine nasquèt a París en 1941 dins una familha de classa mejana d'origina ucraïniana e jusieva. Del temps de l'ocupacion alemanda, foguèt amagat en cò de parents parisencs a Danizy, vilatjòt del departament d'Aisne. Estudièt al Licèu Condorcet de la capitala francesa e anèt puèi a la Facultat de Letras. S'engatgèt en 1956 dins las Joventuts comunistas, l'organizacion del jovent del PCF. Contunhèt puèi sos estudis d'istòria en militar parallèlament dins l'Union dels Estudiants Comunistas (UEC). Obtenguèt alara un DESS d'istòria jos la direccion de l'istorian especialista del mond germanic e de las ideologias politicas Jacques Droz. De 1966 a 1968 trabalhèt coma mèstre auxiliar en istòria al Licèu Voltaire e coma secretari de redaccion a Hachette.

Se maridèt en 1962 amb una ensenhaira, Michèle Martinet, filha de Gilles Martinet, jornalista e ancian deputat socialista al Parlament Europèu, un dels fondadors del PSU e ambaissador a Roma.