Benjamin Vautier
Benjamin Vautier, mai conegut sota lo sobrenom de Ben, es un artista niçard nascut en 1935 a Nàpols (Itàlia) e mòrt lo 5 de junh de 2024. Seis obras mai conegudas son lei escrichs de pintura blanca sus fond negre. Foguet politicament influençat per Francés Fontan e de fach defend leis ideias etnistas, la lenga e la cultura occitana.
Biografia[modificar | Modificar lo còdi]
Benjamin Vautier es nascut lo 18 de julhet de 1935, a Nàpols (Itàlia), de maire irlandesa e occitana, e de paire soís francofòn. Es lo rèirepichòt-filh del pintre Marc Louis Benjamin Vautier. Viu las cinc primièras annadas de sa vida a Nàpols.
Après la declaracion de la Segonda Guèrra Mondiala, en 1939, Ben e sa maire multiplican los viatges: Soïssa, Turquia, Egipte, Itàlia, per s'installar enfin a Niça en 1949. Estúdia a l'escòla del Pargue Imperial e a la pension del collègi Stanislas. Sa maire li tròba un trabalh de gafet a la librariá Le Nain blau, puèi li crompa una librariá-papetariá. A la fin de las annadas 1950, la vend per obrir una botigueta, carrièra Tonduti de l'Escarea, dont transforma la façana en amolonant quantitat d'objèctes e dins la quala vend de disques de segonda man.
Lèu, sa botiga ven un luòc de rescontres e de mòstras ont se retròban los principals membres de çò que vendrà l'Escòla de Niça: Cesar, Arman, Martial Raysse e plan d'autres. De nombroses tèmas son discutits: filosofia, teologia e economia. Pròche d'Yves Klein e sedusit pel realisme novèl, Ben es convencut que « l'art deu èsser novèl e portar un tust. »
En 1955, pivelat per la banana, realiza una seria de dessenhs que marca lo començament de sas recèrcas graficas. En 1959, comença sos « esculturas vivas » : signa de gents dins la carrièra, sos amics, e sa quita familha.